Múrájat hám usınıslardan ámeliy nátiyjelerge qaray. Beruniy rayonı hákimi jaslar isbilermenligine ayrıqsha itibar qarattı.
2026-07-11 18:05:00 / Министрлик
Aymaq basshılarınıń jaslar menen hár piyshembi kúnindegi ushırasıwları dawamında olardıń usınıs hám pikirlerinen kelip shıqqan halda járdem beriw sisteması jolǵa qoyılǵan. Beruniy rayonı hákimi Ikram Xidirov rayon jasları menen ótkergen gezektegi ushırasıwında óz isbilermenligin baslaw tilegindegi jaslarǵa balıqshılıq tarmaǵın rawajlandırıw, bul baǵdarda rayonda imkaniyatlar bar ekenligi boyınsha usınıslardı alǵa qoyǵan edi. Búgin bolsa Altınsay awıl puqaralar jıyını aymaǵında shólkemlestirilgen jasalma kóllerde baǵılıp atırǵan balıqlar, sonday-aq, usı aymaqtan párman tiykarında isbilermenlerge beriliwi rejelestirilip atırǵan jasalma kól basseynlerine jaslar menen biznes sayaxat shólkemlestirildi. "Balıqshılıq tarmaǵın rawajlandırıwǵa baylanıslı qosımsha ilajlar haqqında"ǵı Prezident Pármanı (PP-122-sanlı, 02.07.2026-j.) qabıl etildi. Párman tiykarında Beruniy rayonında 500 gektar jer maydanında jasalma kóller shólkemlestirilip, aukcion tiykarında 49 jılǵa ijara shártnaması tiykarında beriliwi rejelestirilgen. Balıqshılıq baǵdarın bunnan bılay da rawajlandırıw, xalıqtıń balıq ónimlerine bolǵan tutınıw talabınan kelip shıqqan halda ishki bazarǵa arzanlastırılǵan balıq ónimlerin jetkerip beriw tiykarǵı maqset esaplanadı. Beruniy rayonı hákiminiń orınbasarı Davronbek Karimov basshılıǵında ótkerilgen biznes sapar dawamında jaslar, balıqshılıq baǵdarında ózlerin qızıqtırǵan sorawlarǵa tarawda jumıs alıp barıp atırǵan isbilermenlerden juwap aldı. Ajıratılatuǵın jerlerde jaslarǵa beriletuǵın imkaniyatlar menen de tanıstı.