Piyshembi Jaslar kúni. Beruniy rayonı hákimine jaslar qanday mashqalalar menen múrájat etti? Tolıq tanısıń
2026-07-09 12:35:00 / Министрлик
Beruniy rayonı hákimi Ikram Xidirov hám huqıq qorǵaw uyımı basshılarınıń jaslar menen ushırasıwı bolıp ótti. Xosh búgin jaslardıń mashqalaları nelerden ibarat, olardıń máselelerine qanshelli itibar qaratılǵan?
Beruniy rayonı xalqınıń derlik 54 mıńın jaslar quraydı. Olardıń múrájatların úyreniw, sistemalı jumıslardı shólkemlestiriw maqsetinde hár hápteniń piyshembi kúni húrmetli Prezidentimiz tárepinen "Jaslar kúni" dep járiyalanǵan hám usı kúnde barlıq buwındaǵı basshılar jaslar menen ushırasıp, olardıń mashqalaların tıńlaydı, sheshedi, huqıqıy járdemler beredi. Búgin Beruniy rayonı hákiminiń basshılıǵında ótkerilgen ushırasıw dawamında da jaslardıń túrli máseleleri boyınsha múrájatları tıńlandı. 15 jastıń turaqlı jumıs penen bántlik máselesi, kredit alıwda júzege kelip atırǵan tosqınlıqlar, óz isbilermenligin baslaw tilegindegi jaslardıń múrájatları taraw wákilleri menen birgelikte úyrenildi. Joqarı bilimlendiriwdi tamamlap baǵdarı boyınsha jumıs izlep atırǵan jaslar rayonlıq mektepke shekemgi hám mektep bilimlendiriwi bólimine baǵdarlanǵan bolsa, óz isbilermenligin baslaw tilegindegi jaslar ushın biznes-sapar shólkemlestiriletuǵını belgilendi. Bir qatar máseleler boyınsha túsinikler berilip, qadaǵalawǵa alınǵan múrájatlar ornına shıqqan halda úyreniliwi tapsırıldı. Sonıń menen birge ilaj qatnasıwshılarına rayondaǵı bos jumıs orınları haqqında da maǵlıwmat berilip ótildi. Bunday ushırasıw hám sóylesiwler sistemalı ótkerilse, keleshek ieleriniń erteńgi kúnge bolǵan isenimi jáne de artatuǵınına isenemiz.