Elimizde korrupciyaǵa qarsı gúresiw hám onıń aldın alıw tarawında ámelge asırılıp atırǵan reformalar haqqında
2026-06-02 17:30:00 / Министрлик
Elimizde korrupciyaǵa qarsı gúresiw mámleketlik siyasattıń tiykarǵı baǵdarı esaplanıp, sistemalı reformalar, atap aytqanda, Prezident Shavkat Mirziyoevtiń baslaması menen qatań ilajlar, jańa nızam hám mámleketlik baǵdarlamalar ámelge asırılmaqta. Korrupciya - bul shaxstıń óz lawazım yamasa xızmet dárejesinen jeke mápleri yamasa basqa shaxslardıń mápleri jolında materiallıq yamasa materiallıq emes payda alıw maqsetinde nızamǵa qayshı túrde paydalanıwı, sonday-aq bunday paydanı nızamǵa qayshı túrde usınıw, korrupciya belgileri bolǵan, islengeni ushın nızamshılıqta juwapkershilik názerde tutılǵan qılmıs túsiniledi. Korrupciyaǵa qarsı gúresiw tarawındaǵı mámleketlik siyasattıń tiykarǵı baǵdarları tómendegilerden ibarat: xalıqtıń huqıqıy sanası hám huqıqıy mádeniyatın arttırıw; jámiette korrupciyaǵa mawasasız múnásibetti qáliplestiriw, mámleketlik hám jámietlik turmıstıń barlıq tarawlarında korrupciyanıń aldın alıwǵa baylanıslı ilajlardı ámelge asırıw, korrupciyaǵa baylanıslı huqıqbuzarlıqlardı óz waqtında anıqlaw, olarǵa shek qoyıw, olardıń aqıbetlerin, olarǵa imkaniyat beretuǵın sebepler menen sharayatlardı saplastırıw, korrupciyaǵa baylanıslı huqıqbuzarlıqlardı islegenlik ushın juwapkershiliktiń sózsizligi principin támiyinlewden ibarat. Korrupciya búgingi kúnde dúnyanıń kóplegen mámleketleriniń rawajlanıwına unamsız tásir etip atırǵan eń úlken mashqalalardan biri bolıp esaplanadı. Ol jámiyette ádalacızlıqtı kúsheytedi, ekonomikalıq rawajlanıwǵa tosqınlıq etedi hám puqaralardıń mámleketlik shólkemlerge bolǵan isenimin tómenletedi. Sol sebepli mámleketimizde de korrupciyaǵa qarsı gúresiw hám onıń aldın alıw mámleketlik siyasattıń tiykarǵı baǵdarlarınan biri sıpatında belgilengen. Sońǵı jılları Ózbekstanda korrupciyaǵa qarsı gúresiw boyınsha keń kólemli reformalar ámelge asırılmaqta.
Nókis rayonlar aralıq hákimshilik
sudınıń sudya járdemshisi A.Kenesbaeva