Jizzax viloyati Zomin tumani hokimligi

Sudlarda korrupsion holatlarni oldini olish, sudya va sud apparati xodimlarining korrupsiyaga bo‘lgan murosasizligini shakllantirish va rivojlantirish, uning oldini olishga qaratilgan chora-tadbirlarda keng ko‘lamli ishtirok etish, korrupsiyaga qarshi kurashish yuzasidan aholi ongini huquqiy ong va huquqiy madaniyatni yuksalitirshga qaratilgan targ‘ibotlarni amalga oshirish maqsadida Zomin tumanlararo sudi binosida Zomin tumanlararo iqtisodiy sudi, Fuqarolik ishlari bo‘yicha Zarbdor tumanlararo sudi raislari, sudyalari, sud apparati xodimlari hamda ularning ota-onalari ishtirokida “Biz korrupsiyaga qarshimiz” g‘oyasi asosida yig‘ilish tashkil etilib, tadbir ishtirokchilarining korrupsiyaga qarshi kurashish bo‘yicha amalga oshirilayotgan islohatlar va sud tizimida bajarilayotgan vaaziflar yuzasidan fikr-mulohazalari va takliflari bayon etildi.

         Shuningdek tadbir davomida  Zomin tumanlararo iqtisodiy sudi va Fuqarolik ishlari bo‘yicha Zarbdor tumanlararo sudi hamkorligida ishlab chiqilgan ma’rifat soati rejasining navbatdagi yig‘ilishi bo‘lib o‘tdi.

         Jumladan, mazkur ma’rifat soatida ma’ruzachi xisoblangan Fuqarolik ishlari bo‘yicha Zarbdor tumanlararo sudi devonxona mudiri Sh.Cho‘liboev so‘zga chiqib, O‘zbekiston Respublikasi Prezidentining 2023 yil 11 sentabrdagi “O‘zbekiston 2030” strategiyasi to‘g‘risida PF-163-sonli Farmonining mazmun-mohiyati haqida tushuntirishlar berib o‘tdi.

         Xususan, mazkur farmonda quyidagilar nazarda tutilgan.

         O‘zbekiston taraqqiyot strategiyasini amalga oshirish jarayonida orttirilgan tajriba va jamoatchilik muhokamasi natijalari asosida ishlab chiqilgan “O‘zbekiston — 2030” strategiyasi
1-ilovaga muvofiq tasdiqlansin.

“O‘zbekiston — 2030” strategiyasida quyidagi asosiy g‘oyalar aks ettirilganligi inobatga olinsin:

barqaror iqtisodiy o‘sish orqali daromadi o‘rtachadan yuqori bo‘lgan davlatlar qatoridan o‘rin olish;

aholi talablariga va xalqaro standartlarga to‘liq javob beradigan ta’lim, tibbiyot va ijtimoiy himoya tizimini tashkil qilish;

aholi uchun qulay ekologik sharoitlarni yaratish;

xalq xizmatidagi adolatli va zamonaviy davlatni barpo etish;

mamlakatning suvereniteti va xavfsizligini kafolatli ta’minlash.

2. Quyidagilar:

“O‘zbekiston — 2030” strategiyasini amalga oshirish va uning maqsadli ko‘rsatkichlariga erishish barcha davlat organlari va tashkilotlari faoliyatida eng ustuvor vazifa etib belgilansin hamda bu bo‘yicha ularning birinchi rahbarlariga shaxsiy mas’uliyat yuklansin;

“O‘zbekiston — 2030” strategiyasi doirasida Yangi O‘zbekiston taraqqiyot strategiyasida belgilangan va amalga oshirilishi davom etayotgan, o‘z ahamiyatini yo‘qotmagan barcha maqsadlarga erishish va dolzarb vazifalar bajarilishi ta’minlansin.

3. “O‘zbekiston — 2030” strategiyasini amalga oshirish bo‘yicha Respublika komissiyasi (keyingi o‘rinlarda — Respublika komissiyasi) tarkibi 2-ilovaga muvofiq tasdiqlansin.

Respublika komissiyasi (A. Aripov) zimmasiga:

a) “O‘zbekiston — 2030” strategiyasining to‘liq, o‘z vaqtida va sifatli bajarilishini tashkil etish, shuningdek, uni amalga oshirish bo‘yicha tegishli yillik dasturlarni tayyorlash va ijrosini muvofiqlashtirish;

b) “O‘zbekiston — 2030” strategiyasi doirasidagi islohotlar bo‘yicha tadbirlarning aholi tomonidan bildirilgan fikr va tashabbuslar asosida sifatli amalga oshirilishi, belgilangan ko‘rsatkichlarga erishilishini nazorat qilib, natijasi yuzasidan har yarim yilda O‘zbekiston Respublikasi Prezidentiga axborot kiritilishini ta’minlash;

v) ikki oy muddatda:

Yangi O‘zbekiston taraqqiyot strategiyasining joylarda amalga oshirilishi natijalari tanqidiy o‘rganilishini;

aholi o‘rtasida Yangi O‘zbekiston taraqqiyot strategiyasini amalga oshirish natijalari keng muhokama qilinishi, fuqarolarning mazkur masala bo‘yicha takliflari tizimlashtirilgan holda tahlil etilishini;

o‘tkazilgan o‘rganishlar natijasiga ko‘ra, Yangi O‘zbekiston taraqqiyot strategiyasida belgilangan maqsad va vazifalarni ro‘yobga chiqarishga to‘sqinlik qilayotgan tizimli omillarni aniqlash va “O‘zbekiston — 2030” strategiyasini amalga oshirish doirasida ularning oldini olish bo‘yicha aniq choralar ko‘rilishini ta’minlash vazifalari yuklansin.

4. Qoraqalpog‘iston Respublikasi Jo‘qorg‘i KenGESi, viloyatlar va Toshkent shahar xalq deputatlari Kengashlariga “O‘zbekiston — 2030” strategiyasining hududlar kesimida ijro etilishi yuzasidan vazirlik va idoralar hududiy bo‘linmalari rahbarlarining axborotini har chorakda eshitish va tanqidiy muhokama qilib borish tavsiya etilsin.

5. “O‘zbekiston — 2030” strategiyasi va uni bajarish bo‘yicha amaliy chora-tadbirlar ijrosi, tegishli maqsadli ko‘rsatkichlarga erishilishi va ular doirasida normativ-huquqiy hujjatlar o‘z vaqtida ishlab chiqilishi ustidan nazoratni quyidagi tartibda amalga oshirish belgilansin:

a) Adliya vazirligi Hisob palatasi, “Taraqqiyot strategiyasi” markazi va “Yuksalish” umummilliy harakati bilan birgalikda “O‘zbekiston — 2030” strategiyasi va uni tegishli yillarda amalga oshirish bo‘yicha chora-tadbirlar bajarilishini tizimli monitoring qilib, uning natijalarini har oyda Respublika komissiyasiga kiritib boradi;

b) Qoraqalpog‘iston Respublikasi Jo‘qorg‘i KenGESi, viloyatlar, tumanlar va shaharlar xalq deputatlari Kengashlari o‘z hududlarida “O‘zbekiston — 2030” strategiyasi ijrosining tegishli yillarda hududlar kesimida amalga oshirilishi bo‘yicha har chorakda nazorat tadbirlarini o‘tkazadi;

v) Vazirlar Mahkamasi har oyda “O‘zbekiston — 2030” strategiyasi amalga oshirilishini Bosh vazir o‘rinbosarlari huzurida tanqidiy ko‘rib chiqishni ta’minlaydi, har chorakda Hukumat majlislarida muhokama qilib boradi hamda o‘z vaqtida va to‘liq bajarilmagan tadbirlar yuzasidan Hukumat a’zolariga, shu jumladan vazirlarga nisbatan tegishli choralar ko‘radi hamda har yarim yilda Oliy Majlis Qonunchilik palatasiga “O‘zbekiston — 2030” strategiyasi amalga oshirilishi yuzasidan hisobot taqdim qiladi.

6. Vazirlar Mahkamasi (A. Aripov) bir oy muddatda:

“O‘zbekiston — 2030” strategiyasini 2023-2024-yillarda hududlar kesimida amalga oshirish chora-tadbirlari bo‘yicha Hukumat qarorlari qabul qilinishini;

“O‘zbekiston — 2030” strategiyasidagi yo‘nalish va maqsadlardan kelib chiqqan holda Bosh vazir o‘rinbosarlariga biriktirilgan tarmoq va sohalar kesimida aniq vazifalar belgilanishini ta’minlasin.

7. Adliya vazirligi mas’ul vazirlik va idoralar bilan birgalikda “O‘zbekiston — 2030” strategiyasi doirasida normativ-huquqiy hujjatlar loyihalarining sifatli va o‘z vaqtida ishlab chiqilishi, kelishilishi, jamoatchilik muhokamasiga qo‘yilishiga amaliy yordam ko‘rsatib borsin.

8. “O‘zbekiston — 2030” strategiyasi — xalq strategiyasi” shiori ostida belgilangan islohotlarning izchil, sifatli va o‘z vaqtida bajarilishi yuzasidan samarali jamoatchilik nazoratini o‘rnatish maqsadida “Taraqqiyot strategiyasi” markazi:

Raqamli texnologiyalar vazirligi bilan birgalikda ikki hafta muddatda “O‘zbekiston — 2030” strategiyasi ijrosining ta’minlanish darajasi, unda belgilangan islohotlarning sifatli amalga oshirilishini aholi tomonidan har bir maqsad va undagi ko‘rsatkichlar kesimida baholash, ular yuzasidan o‘z fikrlarini qoldirish va tashabbuslar bildirish imkoniyatini yaratuvchi onlayn portalni ishga tushirsin;

har oyda baholash natijalari va aholidan kelib tushadigan fikr-mulohazalarni umumlashtirib, Respublika komissiyasiga taqdim etib borsin;

2030-yilgacha bo‘lgan davrda barqaror rivojlanish sohasidagi milliy maqsad va vazifalarni amalga oshirish bo‘yicha muvofiqlashtiruvchi kengash
(J. Qo‘chqorov) bilan birgalikda har yili “O‘zbekiston — 2030” strategiyasining Birlashgan Millatlar Tashkilotining “Barqaror rivojlanish maqsadlari”ga muvofiq amalga oshirilishi bo‘yicha tahlilni jamoatchilik bilan birgalikda o‘tkazish va natijalarini e’lon qilib borish tizimini yo‘lga qo‘ysin;

“O‘zbekiston — 2030” strategiyasi va uni tegishli yillarda amalga oshirish bo‘yicha chora-tadbirlar bajarilishi yakunlariga bag‘ishlangan axborot-tahliliy sharhlarni tayyorlash, ularni xorijiy tillarda e’lon qilish va keng tarqatishni ta’minlasin.

9. Axborot va ommaviy kommunikatsiyalar agentligi, O‘zbekiston Milliy teleradiokompaniyasi va O‘zbekiston Milliy axborot agentligi ommaviy axborot vositalari bilan birgalikda muntazam ravishda:

“O‘zbekiston — 2030” strategiyasida belgilangan maqsad va vazifalarning ommaviy axborot vositalarida, shu jumladan Internet jahon axborot tarmog‘ida va ijtimoiy tarmoqlarda keng sharhlab borilishini hamda uning mazmun-mohiyati jamoatchilikka yetkazilishini;

“O‘zbekiston — 2030” strategiyasi doirasida amalga oshirilayotgan chora-tadbirlarning ijrosi va belgilangan maqsadli ko‘rsatkichlarga erishish holati yuzasidan aholiga xolis va to‘liq ma’lumot yetkazilishini ta’minlasin.

10. Mazkur Farmon ijrosini samarali tashkil qilishga mas’ul va shaxsiy javobgar etib vazirlik va idoralar rahbarlari, Qoraqalpog‘iston Respublikasi Vazirlar Kengashi Raisi, viloyatlar va Toshkent shahar hokimlari belgilansin.

Mazkur Farmon ijrosini har yarim yilda muhokama qilib borish, ijro uchun mas’ul tashkilotlar faoliyatini muvofiqlashtirish va nazorat qilish Respublika komissiyasi zimmasiga yuklansin deb belgilanganligin.

         Sudyalar va sud xodimlari tomonidan yuqoridagi mavzular bo‘yicha qizg‘in savol-javoblar amalga oshirildi.