Jizzax viloyati Zomin tumani hokimligi

Zomin tumanida xotin-qizlar va erkaklar uchun teng huquq hamda imkoniyatlarni ta’minlash, gender tenglik tamoyillarini keng targ‘ib qilish, bu yo‘nalishda faoliyat olib borayotgan tashkilot va subyektlarni qo‘llab-quvvatlash hamda ilg‘or tashabbuslarni rag‘batlantirish maqsadida “Gender tenglik faoli” milliy tanlovi doirasida tadbir o‘tkazildi.

Tadbir O‘zbekiston Respublikasi Oliy Majlisi Senati Kengashining 2026-yil 27-avgustdagi KQ-386-V-son qarorida belgilangan vazifalar va tanlovning tegishli tartib-qoidalari asosida tashkil etildi.

Unda davlat va jamoat tashkilotlari vakillari, nodavlat notijorat tashkilotlari, tadbirkorlik subyektlari, ommaviy axborot vositalari hamda jamoatchilik vakillari ishtirok etdi.

Tadbirni Zomin tumani hokimining o‘rinbosari N. Omonova ochib berdi.
O‘z so‘zida N. Omonova gender tenglikni ta’minlash, xotin-qizlarning huquq va qonuniy manfaatlarini himoya qilish, ularning ijtimoiy-iqtisodiy hayotdagi faolligini oshirish hamda jamiyatda teng huquq va imkoniyatlar tamoyillarini qaror toptirish borasida amalga oshirilayotgan ishlar haqida to‘xtalib o‘tdi.

Ta’kidlanganidek, gender tenglikni ta’minlash — jamiyatning barqaror rivojlanishi, inson huquq va erkinliklarini ta’minlash hamda mavjud salohiyatdan samarali foydalanishning muhim shartlaridan biridir. Shu bois xotin-qizlarning ta’lim olishi, kasb-hunar egallashi, bandligini ta’minlash, tadbirkorlik faoliyatini yo‘lga qo‘yishi, davlat va jamiyat boshqaruvida faol ishtirok etishi uchun yaratilayotgan imkoniyatlarni keng targ‘ib qilish muhim ahamiyat kasb etadi.

Tadbir davomida “Gender tenglik faoli” milliy tanlovi doirasida Zomin tumanida gender tenglikni ta’minlash va targ‘ib qilish yo‘nalishida amalga oshirilgan ishlar, tashabbuslar va faoliyat natijalari e’tirof etildi.

Tanlov Zomin tumanida quyidagi 4 ta yo‘nalish bo‘yicha tashkil etildi:

🏆 “Gender tenglikni ta’minlashda eng faol hududiy tashkilot”
🏆 “Gender tenglikni ta’minlashda eng faol nodavlat notijorat tashkiloti”
🏆 “Gender tenglikni ta’minlashda eng faol tadbirkorlik subyekti”
🏆 “Gender tenglikni targ‘ib qilishda eng faol internet nashri”

Mazkur yo‘nalishlarda faol ishtirok etgan va belgilangan mezonlar asosida g‘olib deb topilgan tashkilot hamda subyektlar sertifikat va esdalik sovg‘alari bilan taqdirlandi.

Alohida ta’kidlash joizki, tanlovning “Gender tenglikni targ‘ib qilishda eng faol internet nashri” yo‘nalishi gender tenglik masalalarini keng jamoatchilikka yetkazish, ijobiy tajribalarni ommalashtirish hamda xotin-qizlarning jamiyatdagi o‘rni va faolligini yoritishda ommaviy axborot vositalari va internet nashrlarining rolini yanada kuchaytirishga xizmat qiladi.

Tadbir davomida gender tenglikni ta’minlash faqat davlat tashkilotlarining emas, balki nodavlat notijorat tashkilotlari, tadbirkorlik subyektlari, ommaviy axborot vositalari va keng jamoatchilikning hamkorlikdagi sa’y-harakatlarini talab qilishi qayd etildi.

Shuningdek, jamiyatda teng huquq va imkoniyatlar tamoyillarini mustahkamlash, xotin-qizlarning ijtimoiy, iqtisodiy va jamoat hayotidagi faolligini qo‘llab-quvvatlash, ularning tashabbuslarini rag‘batlantirish hamda gender tenglik masalalarini keng targ‘ib qilish borasidagi ishlarni izchil davom ettirish muhimligi ta’kidlandi.

“Gender tenglik faoli” milliy tanlovi doirasidagi mazkur tadbir gender tenglik tamoyillarini amaliyotga tatbiq etishda faol ishtirok etayotgan tashkilot va subyektlarni rag‘batlantirish, ilg‘or tajribalarni ommalashtirish hamda jamiyatda teng huquq va imkoniyatlar madaniyatini yanada rivojlantirishga xizmat qiladi.

Zomin tumanida ham gender tenglikni ta’minlash, xotin-qizlarning huquq va manfaatlarini himoya qilish, ularning ijtimoiy-iqtisodiy faolligini oshirish hamda gender tenglik tamoyillarini keng jamoatchilikka yetkazishga qaratilgan ishlar izchil davom ettirilmoqda.