Zomin tumanida Xitoyning Ichki Mo‘g‘uliston delegatsiyasi bilan istiqbolli hamkorlik masalalari muhokama qilindi
2026-06-25 14:45:00 / Yangiliklar
Zomin tumani hokimi Alisher Abdug‘aniyev Xitoy Xalq Respublikasining Ichki Mo‘g‘uliston Avtonom Rayoni Qishloq xo‘jaligi va chorvachilik boshqarmasi hamda ushbu hududning qator yetakchi korxonalari vakillaridan iborat delegatsiyani qabul qildi.
Uchrashuv davomida O‘zbekiston va Xitoy o‘rtasida qishloq xo‘jaligi sohasidagi o‘zaro manfaatli hamkorlikni yanada rivojlantirish, zamonaviy agrotexnologiyalarni joriy etish, investitsion loyihalarni amalga oshirish hamda chorvachilik va dehqonchilik yo‘nalishlarida tajriba almashish masalalari atroflicha muhokama qilindi.
Delegatsiya vakillariga Zomin tumanining qishloq xo‘jaligi salohiyati, unumdor yer maydonlari, chorvachilikni rivojlantirish imkoniyatlari, tabiiy-iqlim sharoiti hamda investorlar uchun yaratilgan qulay shart-sharoitlar haqida batafsil ma’lumot berildi.
Muloqot chog‘ida go‘sht yo‘nalishidagi qoramolchilikni rivojlantirish, sun’iy urug‘lantirish texnologiyalarini joriy etish, sut mahsulotlarini qayta ishlash, veterinariya yo‘nalishidagi hamkorlik, qishloq xo‘jaligi texnikalari va zamonaviy uskunalarni olib kirish, shuningdek, kartoshka, makkajo‘xori, kungaboqar, qovoq urug‘i hamda ozuqabop ekinlarni yetishtirish bo‘yicha istiqbolli loyihalar yuzasidan fikr almashildi.
Shuningdek, qishloq xo‘jaligi mahsulotlarini qayta ishlash, eksport-import aloqalarini kengaytirish, logistika infratuzilmasini rivojlantirish, marketing markazlarini tashkil etish hamda agrokonsalting xizmatlarini yo‘lga qo‘yish masalalari ham muhokama markazida bo‘ldi.
Tomonlar o‘zaro manfaatli hamkorlikni izchil rivojlantirish, qo‘shma investitsiya loyihalarini amalga oshirish va zamonaviy agrotexnologiyalarni joriy etish orqali Zomin tumanining agrar salohiyatini yanada yuksaltirish borasida hamkorlikni davom ettirishga tayyor ekanliklarini bildirdilar.
Mazkur uchrashuv O‘zbekiston va Xitoy o‘rtasidagi strategik sheriklik munosabatlarini hududlar darajasida yanada mustahkamlash, qishloq xo‘jaligi sohasida yangi investitsiyalarni jalb etish hamda uzoq muddatli hamkorlik loyihalarini amalga oshirish yo‘lida muhim qadam bo‘ldi.