Jizzax viloyati Zomin tumani hokimligi

Yoshlarni sog‘lom turmush tarziga yo‘naltirish, ularni sportga keng jalb etish hamda vatanparvarlik ruhida tarbiyalash maqsadida tashkil etilgan “Davlat xavfsizlik xizmati kubogi – 2026” sport musobaqasining Zomin tuman bosqichi yakunlanib, g‘olib va sovrindorlarni taqdirlash marosimi bo‘lib o‘tdi.

Tadbirda Zomin tumani hokimi, tuman Kengashi deputati Alisher Abdug‘aniyev, Zomin tumani Ichki ishlar bo‘limi boshlig‘i, podpolkovnik Isroil Nurmatov, Zomin tumani prokurori Hamidullo Abdullayev, mutasaddi tashkilotlar rahbarlari, yoshlar va keng jamoatchilik vakillari ishtirok etdi.

Tadbir avvalida tuman hokimi so‘zga chiqib sport musobaqalarining yoshlarni jismonan barkamol, ma’nan yetuk va Vatanga sadoqat ruhida tarbiyalashdagi o‘rni va ahamiyatiga alohida to‘xtalib, musobaqa ishtirokchilarini erishgan yutuqlari bilan samimiy tabrikladi.

Tadbirning eng hayajonli lahzalari Davlat xavfsizlik xizmati kubogi doirasida o‘tkazilgan futbol va mini futbol musobaqalari g‘oliblarini taqdirlash jarayonida namoyon bo‘ldi. Faxrli o‘rinlarni qo‘lga kiritgan jamoalar tantanali ravishda e’tirof etildi.

Tadbir davomida O‘zbekiston milliy terma jamoasini qo‘llab-quvvatlash maqsadida yoshlar ishtirokida ommaviy fleshmob namoyish etildi. Vatanparvarlik va birdamlik ruhida tashkil etilgan ushbu chiqishlar tadbirga o‘zgacha shukuh bag‘ishladi.

Shuningdek, xushovoz san’atkorlar ishtirokidagi konsert dasturi yig‘ilganlarga bayramona kayfiyat ulashdi. Yangragan kuy-qo‘shiqlar va sahna chiqishlari tadbirning ko‘tarinki ruhda o‘tishiga xizmat qildi.

Mazkur tadbir yoshlar o‘rtasida sog‘lom turmush tarzini targ‘ib etish, ommaviy sportni rivojlantirish, ularning bo‘sh vaqtini mazmunli tashkil etish hamda yurtimizda hukm surayotgan tinchlik, totuvlik va birdamlik muhitini yanada mustahkamlashga xizmat qildi.