“Payshanba – Yoshlar kuni” doirasida yoshlar bandligi va daromadini oshirish masalalari muhokama qilindi
2026-04-30 19:55:00 / Yangiliklar
Zomin tumanida “Payshanba – Yoshlar kuni” doirasida yoshlar bandligini ta’minlash, ularning daromad manbalarini kengaytirish hamda yer resurslaridan samarali foydalanish masalalariga bag‘ishlangan amaliy o‘rganish va ochiq muloqot tashkil etildi.
Tadbir Zomin tumani Istiqlol mahallasida o‘tkazilib, unda tuman hokimi Alisher Abdug‘aniyev, huquq-tartibot organlari xodimlari, tuman yoshlari, yosh dehqon va fermerlar hamda mutasaddi tashkilotlar vakillari ishtirok etdilar. Yoshlarga ajratilgan yer maydonlari joyiga chiqib ko‘zdan kechirilib, “Bir kontur – bir mahsulot” tamoyili asosida olib borilayotgan ishlar, ekinlar holati hamda agrotexnik tadbirlar bajarilishi atroflicha o‘rganildi.
Mazkur hududda jami 9 gektar yer maydoni 9 nafar yoshga ajratilgan bo‘lib, ular tomonidan ekinlar parvarish qilinmoqda. Xususan, 4 gektar maydonga makkajo‘xori, 3 gektar maydonga piyoz hamda 2 gektar maydonga arpa ekilgani qayd etildi.
Ochiq muloqot davomida kutilayotgan hosil hajmi, olinadigan daromad, mavjud muammolar va ularning yechimlari yuzasidan batafsil fikr almashildi. Yer maydonlaridan samarali foydalanish, hosildorlikni oshirish, qo‘shimcha daromad manbalarini yaratish hamda ekologik toza mahsulot yetishtirish bo‘yicha tegishli tavsiyalar berildi.
Mazkur tadbir yoshlar bandligini ta’minlash, ularning iqtisodiy faolligini oshirish hamda qishloq xo‘jaligida samaradorlikni yuksaltirishga xizmat qiluvchi muhim amaliy tashabbus sifatida alohida ahamiyat kasb etdi.