Zomin tumanida harbiy xizmatni o‘tab qaytgan yoshlar bilan uchrashuv o‘tkazildi
2026-03-19 16:20:00 / Yangiliklar
Mamlakatimizda yoshlar siyosati ustuvor yo‘nalishlardan biri sifatida izchil amalga oshirilib, ularning sifatli ta’lim olishi, bandligini ta’minlash va tashabbuslarini qo‘llab-quvvatlash borasida keng ko‘lamli ishlar olib borilmoqda. Prezidentimiz tashabbusi bilan haftaning har payshanba kuni “Yoshlar kuni” etib belgilanishi bu yo‘nalishdagi sa’y-harakatlarga yangi sur’at bag‘ishlamoqda.
Ana shu ezgu tashabbus doirasida Zomin tumani hokimi Alisher Abdug‘aniyev muddatli harbiy xizmatni sharaf bilan o‘tab qaytgan yoshlar bilan uchrashdi. Samimiy va ochiq muloqot ruhida o‘tgan uchrashuvda yoshlarning orzu-intilishlari, kelajak rejalari tinglanib, ularni ro‘yobga chiqarish uchun mavjud imkoniyatlar haqida batafsil ma’lumot berildi. Xususan, tadbirkorlikni boshlash uchun ajratilayotgan imtiyozli kreditlar, bandlikni ta’minlashga qaratilgan dasturlar, bo‘sh ish o‘rinlari va kasbga o‘rgatish markazlari faoliyati haqida tushunchalar berildi.
Uchrashuv davomida yoshlarni kasb-hunar egallashga yo‘naltirish, ularni doimiy daromad manbai bilan ta’minlash masalalariga alohida e’tibor qaratildi.
Tadbir yakunida tuman hokimi Alisher Abdug‘aniyev yoshlarni kirib kelayotgan Ramazon hayiti bilan samimiy muborakbod etib, ularning kelgusi hayot yo‘lida ulkan zafarlar va muvaffaqiyatlar tiladi.