“Bahor taronalari” ko‘rik-tanlovining viloyat bosqichi o‘tkazildi
2026-02-26 14:20:00 / Yangiliklar
Zomin tuman 12-son Bolalar musiqa va san’at maktabining faollar zalida “Bahor taronalari” mavzusidagi yangi va eng yaxshi asarlar an’anaviy viloyat ko‘rik-tanlovining viloyat bosqichi bo‘lib o‘tdi.
Mazkur tanlovda Zomin tumani madaniyat bo‘limi hamda Yangiobod tumani madaniyat bo‘limining ijodiy xodimlari va badiiy jamoalari ishtirok etdi.
Tanlov nizomiga muvofiq ishtirokchilar 6 ta yo‘nalish bo‘yicha hakamlar hay’ati tomonidan baholandi. Jumladan, “Navro‘z va bahorni madh etuvchi eng yaxshi qo‘shiq”, “Eng yaxshi folklor-etnografik jamoa”, “Eng yaxshi o‘lan ijrochiligi”, “Eng yaxshi baxshi ijrochiligi”, “Eng yaxshi raqs jamoasi” hamda “Eng yaxshi estrada ijrochiligi” nominatsiyalari bo‘yicha chiqishlar namoyish etildi.
Ko‘rik-tanlov davomida ijodiy jamoalar tomonidan milliy qadriyatlar, bahor faslining go‘zalligi va Navro‘z an’analari tarannum etildi. Ishtirokchilarning ijrochilik mahorati, sahna madaniyati hamda repertuar tanlovi belgilangan mezonlar asosida xolisona baholandi.
Mazkur tadbir hududlarda madaniyat va san’atni rivojlantirish, iqtidorli ijodkorlarni qo‘llab-quvvatlash hamda milliy an’analarni keng targ‘ib etishda muhim ahamiyat kasb etdi.