Zomin tumanida Xitoy kompaniyasi delegatsiyasi bilan qishloq xo‘jaligi istiqbollari muhokama qilindi
2026-01-28 17:40:00 / Yangiliklar
Xitoy Xalq Respublikasining China National Technical Import-Export (CNTIC) kompaniyasining O‘zbekistondagi vakolatxonasi rahbari Van Tszine boshchiligidagi delegatsiya Zomin tumaniga tashrif buyurdi.
Delegatsiya tarkibiga Van Tszine — CNTIC kompaniyasining O‘zbekistondagi vakolatxonasi rahbari, Tsao Yuymin — loyiha menejeri, Dun I — texnik mutaxassis hamda Xe Lixun — tijorat menejeri kirdi.
Tashrif doirasida Zomin tumani hokimi Alisher Abdug‘aniyev boshchiligida tumandagi lalmi va uzumchilikka mo‘ljallangan yer maydonlari ko‘zdan kechirildi. Jarayonda yerlarning hozirgi holati, mavjud infratuzilma, suv ta’minoti imkoniyatlari hamda hosildorlikni oshirishga qaratilgan zamonaviy texnologiyalarni joriy etish masalalari muhokama qilindi.
Tomonlar qishloq xo‘jaligida samaradorlikni oshirish, uzumchilikni rivojlantirish, investitsiya loyihalarini amalga oshirish va texnik yechimlarni tatbiq etish bo‘yicha fikr almashdilar. Uchrashuv yakunida hamkorlikning istiqbolli yo‘nalishlari yuzasidan dastlabki rejalar ishlab chiqildi hamda kelgusida qo‘shma loyihalarni bosqichma-bosqich amalga oshirish bo‘yicha kelishuvlarga erishildi.
Mazkur tashrif Zomin tumanida qishloq xo‘jaligini modernizatsiya qilish, xorijiy investitsiyalarni jalb etish va yangi ish o‘rinlarini yaratishga xizmat qilishi qayd etildi.