Jizzax viloyati Zarbdor tumani hokimligi

Zarbdor tuman 1-son texnikumida O‘zbekiston Respublikasi va Xitoy Xalq Respublikasi o‘rtasidagi hamkorlik aloqalarini yanada rivojlantirish, kasbiy ta’lim tizimida xalqaro tajriba almashish hamda istiqboldagi hamkorlik yo‘nalishlarini muhokama qilishga bag‘ishlangan rasmiy uchrashuv bo‘lib o‘tdi.
Unda Xitoy Xalq Respublikasi Davlat taraqqiyoti va islohotlar komissiyasi huzuridagi Xalqaro hamkorlik markazi vakillari, Jizzax viloyati kasbiy ta’lim boshqarmasi rahbariyati hamda Zarbdor tuman 1-son texnikumi jamoasi ishtirok etdi.
Tadbirda Jizzax viloyati kasbiy ta’lim boshqarmasi boshlig‘i Sarvar Nasarqosimov viloyatda kasbiy ta’lim tizimini rivojlantirish, zamonaviy va mehnat bozorida talab yuqori bo‘lgan kasblarga o‘qitish, ishlab chiqarish korxonalari bilan hamkorlikni kengaytirish hamda ilg‘or xalqaro tajribalarni joriy etish borasida amalga oshirilayotgan ishlar haqida ma’lumot berdi.
Uchrashuv davomida mehmonlarga texnikumning moddiy-texnik bazasi, zamonaviy o‘quv ustaxonalari, amaliy ta’lim xonalari va o‘quvchilar uchun yaratilgan shart-sharoitlar namoyish etildi. Shuningdek, ta’lim jarayoniga innovatsion yondashuvlarni tatbiq etish, dual ta’lim elementlaridan samarali foydalanish hamda bitiruvchilarning bandligini ta’minlash bo‘yicha olib borilayotgan ishlar yuzasidan fikr almashildi.
Muloqot chog‘ida kasbiy ta’lim sohasida hamkorlikni yanada kengaytirish, ilg‘or xorijiy tajribalarni o‘rganish, o‘quv dasturlarini takomillashtirish hamda kelgusida qo‘shma loyihalarni amalga oshirish masalalari muhokama qilindi.

Samimiy va konstruktiv ruhda o‘tgan uchrashuv tomonlar o‘rtasidagi hamkorlik aloqalarini mustahkamlash, kasbiy ta’lim sifatini yanada oshirish hamda xalqaro tajribalarni amaliyotga keng joriy etish yo‘lidagi muhim qadamlardan biri bo‘ldi.