Umidli sportchilarimizning xalqaro maydonlarda erishgan yutuqlari munosib e’tirof etildi
2026-10-20 19:05:00 / Yangiliklar
Avval xabar berganimizdek, oktabr oyining dastlabki kunlarida Ozarbayjonda bo‘lib o‘tgan baydarka va kanoeda eshkak eshish bo‘yicha “Mingachevir regata – 2026” xalqaro musobaqasida O‘zbekiston tumanilik yosh sportchi Jasurbek Abdujumbulov 2 ta oltin va 1 ta kumush medalni qo‘lga kiritdi.
Kuni-kecha Turkiyaning Bursa shahrida qo‘l jangi bo‘yicha yosh sportchilar o‘rtasida o‘tkazilgan Jahon chempionatida esa yana bir umidli sportchimiz Salohiddin Vahobov kumush medal sohibiga aylandi.
Ana shu yosh sportchilarning erishgan yutuqlari bugun tuman hokimligida bo‘lib o‘tgan tantanali tadbirda munosib e’tirof etildi.
Tadbirda tuman hokimi Rasuljon Jo‘rayev, viloyat hokimligi guruh rahbari Yusufjon Kamolov, tegishli mutasaddilar, g‘olib sportchilarning yaqinlari va tengdoshlari, sport murabbiylari hamda jamoatchilik vakillari ishtirok etdi.
Tadbirda so‘z olgan tuman hokimi bugun yurtimizda aholi, ayniqsa yoshlar o‘rtasida sog‘lom turmush tarzini qaror toptirish va ommaviy sportni rivojlantirish borasida amalga oshirilayotgan islohotlar hamda ularning salmoqli natijalari haqida to‘xtaldi. Har ikki sportchining muvaffaqiyati bilan yana bir bor qutlab, ularning izdoshlari ko‘payishiga, yoshlarimizga kelgusi sport bahslarida yanada ulkan g‘alaba va zafarlar yor bo‘lishiga tilaklar bildirdi.
Yosh sportchilarga tuman hokimligining esdalik sovg‘alari topshirildi. Shuningdek, ularning ota-onalari va ustozlariga ham minnatdorlik bildirib, alohida izzat-ikrom ko‘rsatildi.