Tumanda mevalarni quritish, qayta ishlash va qadoqlash yo‘nalishidagi loyihalar ko‘lami kengaytiriladi
2026-09-16 15:15:00 / Yangiliklar
O‘zbekiston tumani hokimi Rasuljon Jo‘rayev bugun "Aroma Fruct" MCHJ shaklidagi O‘zbekiston-Tojikiston qo‘shma korxonasi ta’sischisi Alichon Nematovni qabul qildi.
Jonobod mahallasida joylashgan, 2 million dollar miqdoridagi investitsiya hisobiga tashkil etilgan mazkur qo‘shma korxona mevalarni quritish, qayta ishlash va qadoqlashga ixtisoslashgan bo‘lib, unda yiliga 4,5 ming tonna meva qayta ishlash quvvatiga ega. Loyiha doirasida 45 ta yangi ish o‘rni yaratilgan.
Shu kungacha korxona tomonidan har yili o‘rtacha 3 million dollarlik tayyor mahsulot xorijiy bozorlarga eksport qilinmoqda.
Muloqotlarda endilikda korxona faoliyatini yanada kengaytirish, eksport geografiyasini kengaytirish va hajmini oshirish borasidagi istiqbolli loyihalar xaqida so‘z bordi.
Tuman hokimi ushbu yangi loyihani to‘liq qo‘llab-quvvatlashini hamda uning amalga tadbiq etilishida har tomonlama ko‘maklashishga tayyorligini ma’lum qildi.