Germaniya taraqqiyot banki ishtirokida “O‘zbekistonda kasb-hunar ta’limini qo‘llab-quvvatlash” loyihasi amalda
2026-07-08 20:45:00 / Yangiliklar
O‘zbekiston Respublikasi Vazirlar Mahkamasining “Germaniya Federativ Respublikasi Hukumati bilan moliyaviy hamkorlikda O‘zbekistonda kasbiy ta’limni qo‘llab-quvvatlash dasturlarini amalga oshirish chora-tadbirlari to‘g‘risida” qaror qabul qilingan.
Unga muvofiq, Germaniya Federativ Respublikasi “KfW” bankining granti asosida 7 ta kasbiy ko‘nikmalar markazlarini qurish-montaj qilish, ta’mirlash va jihozlash ishlari amalga oshirilishi belgilangan.
Ayni qaror ijrosi doirasida mazkur loyihani O‘zbekiston tumanida ham amalga oshirish manzilli ro‘yxatdan o‘rin olgan.
Bugun loyiha konsultanti — Germaniyaning xalqaro rivojlanish va konsalting sohasida faoliyat yurituvchi PEM Consult GmbH kompaniyasi ishchi guruhi vakillari O‘zbekiston tumanida bo‘lib, loyihaning I fazasi amaliy ijro bosqichi muhokama qilindi.
Mehmonlarni tuman hokimining o‘rinbosari Muslimbek Ahmedov va tuman Investisiyani jalb qilish va eksport shoʻbasi mudiri Jaxongir Akramov kutib olib, jarayonlarda ularga hamrohlik qildi.
Germaniya konsalting kompaniyasi vakillari bilan muloqotlar va o‘rganishlarda tumanda jadal rivojlanayotgan soha va yo‘nalishlar, hududning “o‘sish nuqtalari”, ehtiyoj yuqori kasblarga mutaxassis tayyorlaydigan muhitni shakllantirish masalalari atroflicha ko‘rib chiqildi.
Shuningdek, tanlab olingan texnikumda o‘quv modullarini dual ta’lim sohasidagi zamonaviy talablarga asoslanib moddiy-texnikaviy va metodologik jihatdan modernizatsiya qilish shartlari xorijiy konsultantlar tomonidan tegishlicha o‘rganildi.