Xitoyning Tyantszin shahrida Toshkent kimyo-texnologiya instituti Yangiyer filialining ilmiy-tadqiqot markazi ochildi
2026-04-01 08:40:00 / Yangiliklar
2026-yil 30-mart kuni Sirdaryo viloyati delegatsiyasining Xitoy Xalq Respublikasiga amalga oshirgan rasmiy tashrifi doirasida Tyantszin shahrida muhim ilmiy-amaliy ahamiyatga ega uchrashuv bo‘lib o‘tdi.
Tashrif davomida Tyantszin Qishloq xo‘jaligi universitetida tantanali uchrashuv tashkil etilib, unda Yangiyer shahri hokimi Otabek Nosirov, Toshkent kimyo-texnologiya instituti Yangiyer filiali direktorining o‘quv ishlari bo‘yicha o‘rinbosari G‘iyos Doniyarov, Guliston davlat pedagogika instituti rektori Jahongir Qarshiboyev hamda Tyantszin Qishloq xo‘jaligi universiteti rektori Jin Veyvey ishtirok etdi.
Muzokaralar chog‘ida tomonlar ilm-fan va ta’lim sohasidagi hamkorlikni yanada kengaytirish, qo‘shma ilmiy tadqiqotlarni yo‘lga qo‘yish, mutaxassislar almashinuvi hamda innovatsion loyihalarni birgalikda amalga oshirish masalalarini atroflicha muhokama qildilar. Uchrashuv konstruktiv ruhda o‘tib, o‘zaro manfaatli kelishuvlarga erishildi.
Tadbirning mantiqiy davomi sifatida Toshkent kimyo-texnologiya instituti Yangiyer filiali huzuridagi ilmiy-tadqiqot markazining tantanali ochilish marosimi bo‘lib o‘tdi. Mazkur markaz ikki tomonlama hamkorlikni yangi bosqichga olib chiqishga xizmat qilishi kutilmoqda.
Yangi tashkil etilgan ilmiy-tadqiqot markazi qishloq xo‘jaligi, sanoat ishlab chiqarishi, xomashyoni qayta ishlash, oziq-ovqat texnologiyalari hamda baliqchilik yo‘nalishlarida ilg‘or ilmiy ishlanmalarni amalga oshirish, zamonaviy texnologiyalarni joriy etish va yuqori malakali mutaxassislar tayyorlashga qaratilgan. Shuningdek, markaz hududlararo ilmiy integratsiyani mustahkamlash va amaliy tadqiqotlar samaradorligini oshirishda muhim platforma vazifasini bajaradi.
Mazkur tashabbus O‘zbekiston va Xitoy o‘rtasidagi ta’lim va ilm-fan sohasidagi strategik hamkorlikni mustahkamlash yo‘lida muhim qadam sifatida baholanmoqda.