Янгибозор тумани прокурори Б.Б.Эшназаровнинг Янгибозор тумани аҳолисига мурожаати.
2026-03-28 16:55:00 / Yangiliklar
Янгибозор туманида ҳокимлик, прокуратура, ички ишлар бўлими, маҳалла еттилиги ва бошқа масъул идора ва ташкилотлар томонидан Ўзбекистон Республикаси Президентининг 05.01.2026 йилдаги “Республика маҳаллаларида хавфсиз муҳитни яратиш йўналишида яхлит манзилли ишлаш тизимини жорий этишга қаратилган қўшимча чора-тадбирлар тўғрисида”ги ПҚ-1-сонли, “2026 йилда республика маҳаллаларида жиноятчиликнинг барвақт профилактикаси самарадорлигини янада ошириш бўйича ташкилий чора-тадбирлар тўғрисида”ги ПҚ-2-сонли ва 14.03.2017 йилдаги ПҚ-2833-сонли Қарорлари ижросини таъминлаш бўйича тизимли ижтимоий-профилактик тадбирлар ўтказилмоқда.
Бунинг натижасида жорий йилнинг ўтган даврида туманда криминоген вазиятга таъсир қилувчи қасддан одам ўлдириш, оғир тан жароҳати етказиш, босқинчилик, талончилик, безорилик ва номусга тегиш жиноятлари содир этилмади.
Бироқ, жорий йилнинг ўтган даврида 2 та ўғрилик, 32 та кибер жиноятлар қайд этилди.
Жумладан, 2026 йил 17 март куни номаълум шахс ахборот технологияларидан фойдаланган ҳолда фуқаро Ш.А.нинг ишончига кириб, қўл телетелефон орқали пластик картасидаги 1,1 млн сўм пулини ечиб олиб, ўзлаштириш йўли билан талон-тарож қилган.
Мазкур ҳолат юзасидан 19.03.2026 йилда Янгибозор тумани
ИИБ томонидан ушбу фуқароларга нисбатан ЖКнинг 169-моддаси 3-қисми “б” банди билан жиноят иши қўзғатилди.
Бундан ташқари, номаълум шахс ахборот технологияларидан фойдаланган холда 2026 йил 22 март куни фуқаро Б.А.нинг ишончига кириб, унинг қўл телефонига қўнғироқ қилиб, унга “Damas” русумли автомашина ютиб олганлигини ва 2.150.000 сўм миқдоридаги пулларни ўтказган тақдирда автомашинани олиб бориб беришини айтиб, Б.А.нинг 2.150.000 сўм пул маблағларини фирибгарлик йўли билан қўлга киритган.
Мазкур ҳолат юзасидан 23.03.2026 йилда Янгибозор тумани
ИИБ томонидан ушбу фуқароларга нисбатан ЖКнинг 168-моддаси 3-қисми “г” банди билан жиноят иши қўзғатилди.
Жиноятларнинг келиб чиқиш сабаб сабаблари ўрганилганда, ўғрилик жинояти фуқароларнинг ўз мулкини сақлашда бепарволиги, қаровсиз қолдириши оқибатида, кибер жиноятлар фуқаролар томонидан телефондан фойдаланиш қоидалари бузилганлиги яъни шахсий, сир сақланиши лозим бўлган маълумотлар ошкора қилганлиги, APK файларни қабул қилиш ва уларга кириш оқибатида содир қилинганлиги аниқланди.
Шу сабабли ҳурматли фуқаролар! Жиноятнинг олдини олиш, унинг қурбони бўлмаслик учун мол-мулкингизни қаровсиз қолдирмаслик, телефондан фойдаланишда шахсий, сир сақланиши лозим бўлган маълумотларни ошкора қилмасликни, APK файларни қабул қилмаслик ва уларга кирмасликка чақирамиз!!!
Ҳурмат билан, туман прокурори Б.Б.Эшназаров
28.03.2026й