Bugun Xiva shahriga Turizm qo‘mitasi raisi Abdulaziz Aqqulov tashrif buyurdi.
2026-01-30 19:20:00 / Yangiliklar
Davlatimiz rahbarining maxsus topshirig‘iga muvofiq, respublikamizda turizm sohasini rivojlantirish, hududlardagi turizmga oid obyekt va lokatsiyalarni o‘rganish, mavjud muammolarni bartaraf etish hamda turizm infratuzilmasini yaxshilash maqsadida shaharda joriy yilda amalga oshirilayotgan loyiha obyektlariga tashrif buyurildi
Xususan, “KAZ DEVELOPMENT INVEST GROUP” MCHJ tomonidan amalga oshirilayotgan, dunyoning yetakchi xalqaro mehmonxona tarmog‘i — Accor’ga mansub mehmonxona loyihasi ko‘zdan kechirildi. Mazkur loyiha Xivaning turistik salohiyatini oshirish, xalqaro sayyohlar oqimini ko‘paytirish hamda xizmatlar sifatini global standartlarga moslashtirishga xizmat qilishi ta’kidlandi.
Shuningdek, Mevaston mahallasida rejalashtirilayotgan “Hunarmandlar markazi” loyihasi bo‘yicha dastlabki reja va konsepsiyalar muhokama qilindi. Loyiha doirasida hududni kompleks rivojlantirish, milliy hunarmandchilikni qo‘llab-quvvatlash va yangi turistik lokatsiya shakllantirish masalalariga alohida e’tibor qaratildi.