Xorazm viloyati Xiva shahar hokimligi

Tadbirda Xiva shahar prokuraturasi tomonidan taqdim etilgan topshiriq asosida hududlarda jinoyatchilik va huquqbuzarliklarning oldini olish borasida amalga oshirilishi lozim bo‘lgan vazifalar muhokama qilindi.
Ta’kidlanganidek, mazkur topshiriq O‘zbekiston Respublikasi Prezidenti tomonidan 2025-yil 18-mart kuni qabul qilingan PK-111-son qaror ijrosini ta’minlash maqsadida berilgan.
Yig‘ilish davomida:
hududlarda sodir etilayotgan jinoyatlar sabablarini chuqur tahlil qilish,
mahallalarda profilaktika tadbirlarini kuchaytirish,
ijtimoiy-maishiy muammolarni aniqlash va ularni bartaraf etish,
yoshlar, xotin-qizlar hamda ijtimoiy himoyaga muhtoj qatlamlar bilan manzilli ishlash,
mas’ul idoralar o‘rtasida hamkorlikni kuchaytirish orqali mahalla jinoyatchiligini kamaytirish vazifalari belgilandi.
Shuningdek, mahallalarda tanqidiy yondashuv asosida mavjud muammolarni o‘rganish, ularni hal etishga qaratilgan 20 kunlik faol ish rejasi ishlab chiqilishi va ijrosi ta’minlanishi qayd etildi.
Mazkur masalalar Xorazm viloyati hokimining 2025-yil 27-noyabrdagi 460-12-0-F/25-son farmoyishi bilan hamohang bo‘lib, viloyat hududida korrupsiyaga qarshi kurashish, huquqiy madaniyatni yuksaltirish va jamiyatda qonun ustuvorligini mustahkamlashga qaratilgan kompleks chora-tadbirlarni nazarda tutadi. Farmoyishga muvofiq, 2025-yil 26-noyabrdan 14-dekabrga qadar viloyat miqyosida “Korrupsiyaga qarshi kurashish kunlari” profilaktik tadbirlari o‘tkazilishi belgilangan .
Yig‘ilish yakunida belgilangan vazifalar ijrosini ta’minlash, jamoatchilik nazoratini kuchaytirish hamda huquqbuzarliklarning oldini olish borasida tizimli ishlarni davom ettirish muhimligi ta’kidlandi.