Xatirchi tumani hokimining bayram tabrigi
2025-12-08 10:00:00 / Rahbariyatning bayonotlari va nutqlari
Xatirchi tumani hokimi Umidjon Adizovning O‘zbekiston Respublikasi Konstitutsiyasining 33 yilligi munosabati bilan tuman aholisiga bayram tabrigi
Assalomu alaykum, aziz tumandoshlar!
Bugun Sizlar bilan O‘zbekiston Respublikasi Konstitutsiyasi qabul qilinganligining 33 yilligini nishonlamoqdamiz.
1992 yil 8 dekabr kuni mamlakatimiz tarixida yangi sahifa ochilib, huquqiy davlat va demokratik jamiyat barpo etish yo‘lida muhim qadam qo‘yildi.
O‘zbekiston Respublikasi Oliy Kengashining XII chaqiriq XI sessiyasida Konstitutsiyamiz qabul qilinib, 8 dekabr umumxalq bayrami sifatida e’tirof etildi.
2023 yil 30 aprel kuni o‘tkazilgan umumxalq referendumida 6 bo‘lim, 27 bob, 155 moddadan iborat Konstitutsiyaning yangi tahriri yanada mustahkam huquqiy asos sifatida tasdiqlandi.
Shu tariqa O‘zbekiston boshqaruvning respublika shakliga ega bo‘lgan suveren, demokratik, huquqiy, ijtimoiy va dunyoviy davlat sifatida o‘z yo‘lini qat’iyat bilan tanladi.
Konstitutsiyamiz — mamlakatimiz mustaqilligining huquqiy poydevori, xalqimiz xohish-irodasining oliy ifodasidir.
U nafaqat asosiy qonunimiz, balki har bir fuqaroning huquq va erkinliklarini kafolatlovchi, adolat va tenglikni ta’minlovchi mustaxkam asosdir.
Shubhasiz, yillar, asrlar o‘tsa ham, Konstitutsiyamiz siyosiy-huquqiy tafakkurimizning yuksak namunasi sifatida avlodlar uchun hayot qomusi va dolzarb muammolar yechimini topishda ishonchli dasturilamal bo‘la oladi.
Bugungi tinch va osoyishta hayotimiz, aholining turmush darajasidagi yuksalish, jamiyat ongu tafakkuridagi o‘zgarishlar — bularning barchasi Konstitutsiyamizda belgilangan qoida va tamoyillarning amaldagi ifodasidir.
So‘nggi yillarda Davlatimiz rahbarining e’tibori va izchil islohotlari natijasida tumanimizda ham keng qamrovli, misli ko‘rilmagan yangilanishlar amalga oshirilmoqda — buni barchangiz kundalik hayotda his qilib kelmoqdasiz.
Ishonchim komilki, bugungi yutuqlarimizni mustahkamlash, oldimizda turgan yuksak maqsadlarga erishishda tumanimiz faollari, keng jamoatchilik va barcha fuqarolarimiz o‘zining munosib hissasini qo‘shadi.
Tumanimizda qonun ustuvorligini ta’minlash, har bir fuqaroning huquq va erkinliklarini himoya qilish barchamizning oldimizda turgan muhim vazifalarimizdan biridir.
Hurmatli tumandoshlar!
Sizlarni, O‘zbekiston Respublikasi Konstitutsiyasi qabul qilinganligining 33 yillik bayrami bilan chin qalbimdan tabriklayman.
Barchangizga mustahkam sog‘lik-salomatlik, oilaviy baxt, yurtimiz ravnaqi yo‘lida olib borayotgan ishlaringizga ulkan zafarlar tilayman.
Aziz tumandoshlar, bayramingiz muborak bo‘lsin!
