O‘zbekiston Respublikasi Transport Vazirligi Huzuridagi Transport Nazorati Inspeksiyasi

Hurmatli hamkasblar, aziz yurtdoshlar!

Mamlakatimizda korrupsiyaning oldini olish va unga qarshi kurashish, jamiyatning barcha sohalarida korrupsion holatlarni keltirib chiqaruvchi omillarga chek qo‘yishga qaratilgan keng ko‘lamli islohotlar olib borilmoqda.

Jumladan, O‘zbekiston Respublikasining “Korrupsiyaga qarshi kurashish to‘g‘risida”gi Qonuni va qator Farmon, Qarorlar qabul qilinib, korrupsiyani oldini olish bo‘yicha ustuvor vazifalar belgilab berildi.

Korrupsiyaga qarshi kurashish bo‘yicha Milliy kengash yig‘ilishida Davlatimiz rahbari o‘z nutqida korrupsiya - islohotlar yo‘lidagi eng katta to‘siq va g‘ov ekanini ta’kidladi.

Fikri toza, korrupsiyaga toqatsiz yangi avlodni tarbiyalash maqsadida ta’lim maskanlarida halollik g‘oyalarini singdirish, ularning tashabbuslarini qo‘llab-quvvatlash muhimligi ko‘rsatib o‘tildi.

Davlatimiz rahbarining jamoatchilikka murojaatida korrupsiyaga qarshi kurashish umummilliy vazifa, har bir vatanparvar yurtdoshimizning vijdon ishi ekanligi ta’kidlab o‘tildi.

Umuman, ilk marotaba bunday tarzda yig‘ilish o‘tkazilishi korrupsiyaga qarshi kuchli siyosiy irodani namoyon etdi. Davlatimiz rahbari 55 ta aniq maqsadga yo‘naltirilgan tashabbuslarni ilgari surdi.

Ular doirasida 5 ta Qonun, 12 ta farmon va qarorlar ishlab chiqiladi. Korrupsiyaga qarshi kurashishda Parlament, Milliy va hududiy kengashlar, fuqarolik jamiyati institutlarining roli oshiriladi.

Transport nazorati inspeksiyamiz tizimida korrupsiyaviy holatlarni oldini olish bo‘yicha qator amaliy ishlar qilinmoqda. Xususan, inspeksiya markaziy apparatida korrupsiyaga qarshi kurashish bo‘yicha mas’ul xodim faoliyat ko‘rsatmoqda. Korrupsiyaga qarshi kurashish bo‘yicha Сhora-tadbirlar dasturi va korrupsiyaviy xavf-xatarlar xaritasi tasdiqlanib, ustuvor vazifalar belgilab olindi.

Shuningdek, Inspeksiyaning korrupsiyaga qarshi kurashish bo‘yicha Siyosati, korrupsiyaviy xavf-xatarlarni baholash Uslubiyoti, manfaatlar to‘qnashuvini boshqarish bo‘yicha Nizom, aloqa kanallari orqali korrupsiyaviy xatti-harakatlar to‘g‘risida kelib tushgan xabarlarni qabul qilish va ko‘rib chiqish Reglamenti, etika va korrupsiyaga qarshi kurashish sohasida o‘qitilishini tashkil qilish bo‘yicha, kontragentlarni tekshirishga oid va ishga qabul qilinayotgan nomzodlarni tekshirish bo‘yicha Yo‘riqnomalar, Korrupsiyaga qarshi tartib-taomillarning samaradorligini monitoring va nazorat qilish Uslubiyoti, korrupsiyaga qarshi kurash tizimining holati to‘g‘risidagi hisobotni shakllantirish va taqdim etish bo‘yicha Nizom hamda korrupsiyaviy xatti-harakatlari va odob-axloq qoidalarini buzish holatlari ustidan xizmat tekshiruvlari o‘tkazish bo‘yicha Reglamenti qabul qilingan o`lib, tizimli ishlar olib borilmoqda.

O‘zbekiston Respublikasi Vazirlar Mahkamasining “Korrupsiyaga oid huquqbuzarlik haqida xabar bergan yoki korrupsiyaga qarshi kurashishga boshqa tarzda ko‘maklashgan shaxslarni rag‘batlantirish tartibi to‘g‘risidagi nizomni tasdiqlash haqida”gi 829-son qaroriga muvofiq Inspeksiyada korrupsiya haqida xabar bergan shaxslarni ragʻbatlantirish tartibi joriy etildi.

Inspeksiyaning tegishli buyrug‘iga muvofiq Davlat xizmatini rivojlantirish agentligi bilan hamkorlikda e’lon qilingan mustaqil, ochiq tanlov asosida ishga qabul qilish ishlari amalga oshirib kelinmoqda.

Inspeksiyada xodim va ish beruvchi o‘rtasida tuzilgan mehnat shartnomalariga korrupsiyaga qarshi kurashish bo‘yicha shartlar kiritildi.

Bundan tashqari, sohani raqamlashtirish orqali shaffoflikni ta’minlash bo‘yicha tizimda barcha yo‘nalishdagi funksiyalarni bosqichma-bosqich raqamlashtirish davom etmoqda. Bu kabi ishlarimiz bundan keyin ham davom ettiriladi.

Inspeksiyamizni korrupsiyasiz sohaga aylantirish uchun barcha kuch va imkoniyatlar mavjud va biz ulardan foydalanamiz. 

 Hurmatli hamkasblar !

Transport nazorati inspeksiyasi tizimi xodimi degan yuksak sharafli maqom egasi sifatida shubha uyg‘otuvchi harakatlar, so‘zlardan tiyilishimiz, hamma joyda yurish-turishimiz, harakatlarimiz bilan boshqa davlat xizmatchilariga va oila a’zolarimizga namuna bo‘lishimiz zarur.

Shunday ekan Inspeksiya tizimidagi barcha xodimlar o‘z xizmat vazifalarini bajarishda:

* Inspeksiyaning korrupsiyaga qarshi kurashish siyosatiga amal qilishi hamda uning tamoyillari va talablariga qat’iy rioya etishlari kerak;

* korrupsiya bilan bog‘liq har qanday xatti-harakatlarda ishtirok etishi taqiqlanadi;

* xodimlar ularni korrupsiya bilan bog‘liq huquqbuzarlikni sodir etishga undovchi shaxslarning har qanday murojaatlari to‘g‘risida, shuningdek, boshqa xodimlar tomonidan sodir etilgan korrupsiyaga oid qonunbuzilish holatlari haqida o‘z rahbarlariga va Inspeksiyaning korrupsiyaga qarshi kurashish bo‘yicha mas’ul xodimiga xabar berishlari shart;

* bevosita rahbari yoki mas’ul shaxsni manfaatlar to‘qnashuvi ehtimoli haqida xabardor qilishi lozim.

Har birimiz o‘z ishimizga halol va vijdonan yondashsak, albatta oldimizga qo‘yilgan maqsadlarga erishamiz.

Inspeksiya tizimida faoliyat olib borayotgan har bir xodim har qanday korrupsiyaviy holat uchun jazo muqarrarligini va kechirilmasligini bilishi shart!

Hurmatli fuqarolar va jamoatchilik vakillari!

Transport nazorati inspeksiyasini “korrupsiyasiz soha”ga aylantirishda jamoatchilik vakillari hamda fuqarolarimiz roli alohida ahamiyat kasb etadi. Shu sababli Inspeksiya tizimida korrupsiyaga qarshi kurashish bo‘yicha
Sizlarni hamkorlikka chaqirib qolamiz.

Tizimdagi korrupsiyaviy holatlar yuzasidan fikr-mulohazalar va takliflar uchun Inspeksiyaning elektron pochta manzili: antikorrupsiya@uztn.uz, telegramdagi rasmiy sahifasi: https://gov.uz/oz/uztn/anti-corruption, telegram bot: @anticorruption_uztn_bot hamda murojaat qilish uchun telefon raqam: 71-202-03-02 (515) ishga tushirilgan.

Agar Siz korrupsiyaviy holatlarga duch kelsangiz ushbu aloqa vositalari orqali bizga murojaat qilishingiz so‘raladi.

Barcha axborotlar va ularning mualliflari haqidagi ma’lumotlar sir saqlanishi kafolatlanadi.

(MUROJAAT QILISH UCHUN)

Hurmat bilan,  Transport nazorati inspeksiyasi boshlig‘i J.Karimov.