Shaffoflik va halollik sari yana bir qadam
2026-01-22 11:00:00 / Yangiliklar
Transport nazorati inspeksiyasida yosh xodimlar o‘rtasida korrupsiyaning oldini olish, halollik va mas’uliyat tamoyillarini mustahkamlash maqsadida navbatdagi seminar-trening tashkil etildi. Komplaens nazorat bo‘limi tashabbusi bilan tashkil etilgan tadbirda soha faoliyatini raqamlashtirish orqali shaffoflikni ta’minlash, inson omilini kamaytirish va korrupsion holatlarning oldini olish masalalariga alohida e’tibor qaratildi.
Seminar davomida korrupsiyaga qarshi kurashish bo‘yicha amaldagi qonunchilik talablari, korrupsiya illatining jamiyat va davlat taraqqiyotiga salbiy ta’siri, shuningdek, inspeksiya faoliyatida joriy etilgan zamonaviy raqamli tizimlar va elektron platformalarning ahamiyati to`g`risida tushuntirishlar berildi. Raqamlashtirilgan xizmatlar orqali nazorat jarayonlarining ochiqligi oshayotgani, qarorlar qabul qilishda shaffoflik ta’minlanayotgani alohida ta’kidlandi.
Shuningdek, real hayotiy misollar asosida berilgan tushuntirishlar yosh xodimlarda korrupsiyaga nisbatan murosasiz munosabatni shakllantirishga xizmat qildi. Tadbir davomida ishtirokchilarning savollariga batafsil javoblar berilib, ochiq muloqot olib borildi.
Tadbir yakunida yosh xodimlar korrupsiyaga qarshi qat’iy pozitsiyada bo‘lish, raqamli texnologiyalardan samarali foydalanish hamda xizmat vazifalarini vijdonan va mas’uliyat bilan bajarish borasida o‘z fikr-mulohazalarini bildirdilar. Mazkur seminar yosh kadrlar orasida sog‘lom xizmat muhitini shakllantirish, korrupsiyaga qarshi immunitetni kuchaytirish hamda sohada ochiqlik va samaradorlikni yanada oshirishga xizmat qilishi bilan ahamiyatlidir.