Rasmiy bayonot: Farg‘ona shahri bog‘chalaridagi bolalarning ahvoli qoniqarli
2026-10-26 11:10:00 / Yangiliklar
Farg‘ona shahridagi 2-sonli, 7-sonli va 47-sonli maktabgacha ta’lim tashkilotlari tarbiyalanuvchilari tana haroratining ko‘tarilishi, qorin sohasida og‘riq, holsizlik, ko‘ngil aynishi va ich ketishi kabi shikoyatlar bilan Farg‘ona viloyati yuqumli kasalliklar shifoxonasiga murojaat qilgan.
Dastlabki epidemiologik surishtiruvlar uchun MTTlarda bolalar iste’mol qilgan oziq-ovqat mahsulotlari va taomlar o‘rganildi. Jumladan, nonushta, tushlik, kechki tamaddida iste’mol qilgan mahsulotlari, mahsulotlar yetkazib beruvchilar aniqlangan.
Oziq-ovqat mahsulotlari hamda tayyor taomlardan bakteriologik tekshiruvlar uchun namunalar olingan.
Ayni vaqtda epidemiologik surishtiruv va laboratoriya tekshiruvlari davom etmoqda.
2026-yil 26-oktabr soat 11:00 holatiga 28 nafar bola yuqumli kasalliklar shifoxonasida davolanmoqda. Bemorlarning umumiy ahvoli barqaror, og‘ir ahvoldagi bemorlar mavjud emas.
Murojaat qilgan 23 nafar bolaning umumiy ahvoli qoniqarli deb baholanganligi sababli ularga tegishli tibbiy tavsiyalar berilib, uy sharoitida davolanish uchun ruxsat etilgan.