O‘zbekiston va Koreya kompaniyasi raqamli chorvachilik loyihalariga 20 mln dollar investitsiya kiritishni rejalashtirmoqda
2026-10-19 10:00:00 / Yangiliklar
Oziq-ovqat mahsulotlari xavfsizligi qoʻmitasi raisi Azizbek Urunov Koreya Respublikasining “INPRO Inc.” kompaniyasi bosh direktori Choi Seung-hyeok bilan uchrashdi.
Muloqotda tomonlar chorvachilikka zamonaviy raqamli texnologiyalarni joriy etish, hayvonlarni identifikatsiya qilish va ushbu tizimini rivojlantirish, chorvachilik genetikasi sohasida innovatsion yechimlarni qoʻllash kabi bir qator masalalarni muhokama qilindi.
Kompaniya vakillari DLGS (Digital Livestock Global System) raqamli tizimini taqdim etdi. Tizim ISO/ICAR xalqaro standartlariga mos RFID quloq birkalari va bulutli platformaga asoslangan. U har bir hayvonning tugʻilishi, sogʻligʻi, emlanishi va koʻchirilishi haqidagi maʼlumotlarni real vaqt rejimida monitoring qilish imkonini beradi.
Kompaniya vakillarining taʼkidlashicha, mazkur tizim hayvonlarni majburiy identifikatsiya qilish va roʻyxatga olish boʻyicha qonunchilik talablarini bajarishga ko‘maklashadi. Shuningdek, u epizootik vaziyatni nazorat qilish va chorva mahsuldorligini oshirishga xizmat qiladi.
Uchrashuv yakunida tomonlar oʻrtasida Anglashuv memorandumi imzolandi. Memorandum doirasida:
- Oʻzbekistonda raqamli chorvachilik va chorvachilik genetikasi loyihalariga 20 mln dollari miqdorida investitsiya kiritish;
- kompaniya bir yil davomida raqamli chorvachilik va qishloq xoʻjaligi genetikasi yoʻnalishida tajriba loyihasini amalga oshirish;
- hamkorlik uchun mahalliy korxonalar, ilmiy-tadqiqot muassasalari va fermer xoʻjaliklarini jalb etish;
- ilmiy-tadqiqot va tajriba-sinov ishlarini olib borish hamda mutaxassislar malakasini oshirishga kelishildi.
Kelgusida tajriba loyihasi natijalari baholanadi va shu asosda hamkorlikni kengaytirish istiqbollari koʻrib chiqiladi.