Bo‘stonliqda issiqxona va dala maydonlarida fitosanitar monitoring o‘tkazilmoqda
2026-10-14 18:50:00 / Yangiliklar
Toshkent viloyati Oziq-ovqat xavfsizligi bosh boshqarmasining Bo‘stonliq tumani bo‘limi mutaxassislari tomonidan hududdagi issiqxonalar hamda kartoshkachilik markazi dala maydonlarida monitoring va nazorat tadbirlari o‘tkazildi.
Monitoring davomida ekinlarning fitosanitar holati o‘rganilib, zararkunandalar va kasalliklarning tarqalish xavfi, o‘simliklarni himoya qilish choralari hamda agrotexnik tadbirlarning o‘z vaqtida bajarilishiga e’tibor qaratildi.
Zararli organizmlarni dastlabki bosqichda aniqlash ularning keng tarqalishiga yo‘l qo‘ymaslik, hosildorlikni saqlash va o‘simliklarni himoya qilish vositalarini me’yorida qo‘llash imkonini beradi. Shu bois monitoring jarayonida ekinlarning holati muntazam kuzatilib, zararkunandalar soni va tarqalish darajasi bahоlanadi. Olingan natijalar asosida zarur himoya choralari belgilanadi.
Respublika miqyosida ham ushbu yo‘nalishga 2024–2026-yillar davomida mamlakatimizda 11,3 million gektar maydonda fitosanitar monitoring ishlari tashkil etilgan. Shuningdek, “Dala nazorati” elektron tizimi orqali 49 turdagi zararkunanda va 8 turdagi kasallikni 10 kun oldin aniqlash mexanizmi joriy etilgan.
Monitoring yakunida korxona mas’ullariga kimyoviy himoya vositalaridan faqat zaruratga ko‘ra foydalanish, ruxsat etilgan preparatlarni belgilangan me’yorlarda qo‘llash hamda belgilangan muddatlarga qat’iy rioya etish bo‘yicha tushuntirishlar berildi. Shuningdek, shaxsiy himoya vositalaridan foydalanish va biologik kurash usullarini kengaytirish tavsiya etildi.
Fitosanitar monitoringning izchil olib borilishi ekinlarni zararli organizmlardan himoya qilish, hosil sifati va miqdorini saqlash hamdа xavfsiz qishloq xo‘jaligi mahsulotlari yetishtirishga xizmat qiladi.