Namangan viloyati Uychi tumani hokimligi

O‘zbekiston Respublikasi Prezidentining PQ-465 hamda PQ-136-sonli qarorlarida belgilangan vazifalar ijrosini ta’minlash, organik mahsulot yetishtirishni kengaytirish maqsadidai amaliy seminar tashkil etildi. Uychi tumani madaniyat markazida tashkil qilingan seminarda Uchqo‘rg‘on, Norin, Chortoq, Uychi, Yangiqo‘rg‘on tumanlaridan agroklasterlar, fermer va dehqon xo‘jaliklari, tomorqa yer egalari, fitosanitar davlat inspektorlari hamda boshqa mutasaddilar qatnashdilar. Mazkur qarorlarga muvofiq, so‘z olgan O‘simliklar karantini va himoyasi agentligi mas’ul mutaxassis xodimlari hamda "ACS BIO CERTIFICATION MMC" ekspertlari tomonidan Respublika bo‘yicha organik mahsulotlar yetishtirish maydonlarini 20 ming gektarga, “Global G.A.P.” va “BCI (Better Cotton)” sertifikatlariga ega ekin maydonlarini 10 ming gektarga yetkazish, shuningdek, 2026-yil 1-yanvardan boshlab meva-sabzavot mahsulotlari eksporti hisobotini mahsulot yetishtirilgan hudud kesimida yuritish tizimini joriy etishning afzalliklar xususida ma’lumot berishdi. Tadbir davomida organik mahsulot yetishtirishning zamonaviy agrotexnologiyalari, xalqaro standartlar va sertifikatlash talablari, ichki fitosanitariya sertifikatlarini rasmiylashtirishda o‘zgargan tartib, “Agroko‘makchi” mobil ilovasi orqali elektron “Dala daftari”ni yuritish mexanizmlari yuzasidan batafsil ma’lumotlar berib o‘tildi. Shuningdek, dala chetlari, kanallar, kollektor-drenaj va sug‘orish tarmoqlari atrofidagi yer maydonlaridan samarali foydalanish, eksportbop mahsulotlar yetishtirish hajmini oshirish hamda hududning eksport salohiyatini mustahkamlash masalalariga alohida e’tibor qaratildi. Tadbir yakunida ishtirokchilarga belgilangan vazifalarni amaliyotga izchil joriy etish, zamonaviy yondashuvlar asosida ishlab chiqarish samaradorligini oshirish bo‘yicha tegishli tavsiyalar berildi.