Hurmatli Urganch shahar aholisi !

Avvalo, siz azizlarga muhtaram Prezidentimiz tomonidan ilgari surilgan tashabbuslar — mahallalarda xavfsiz va osoyishta muhitni ta’minlash, jinoyatchilikning oldini olish, fuqarolarning huquq va manfaatlarini himoya qilish borasidagi vazifalarning amalda bajarilishi bizning kundalik faoliyatimizning ustuvor yo‘nalishi ekanini alohida ta’kidlamoqchiman.

Shu munosabat bilan, sizlarga murojaat qilish zaruratini his etdim.

So‘nggi vaqtlarda shahrimizda fuqarolarni aldash yo‘li bilan, ayniqsa, bank kartalaridagi mablag‘larni firibgarlik yo‘li bilan qo‘lga kiritish holatlari ko‘paymoqda. Kiberjinoyatlar — zamonaviy davrning eng xavfli ko‘rinishlaridan biridir va ularning oldini olishda sizning ogohligingiz va hushyorligingiz beqiyos ahamiyatga ega. 
Jumladan, 2025 yilning 10 oyi mobaynida Urganch shahrida kiberjinoyatlardan jabrlanganliklari to‘g‘risida fuqarolarimizdan 639 ta murojaatlar kelib tushgan bo‘lib, shularning 110 tasi firibgarlik haqida, 454 tasi o‘g‘irlik haqida, 75 tasi boshqa turdagi murojaatlarni tashkil qiladi.Mazkur holatlar bo‘yicha fuqarolarimizga jami 4 305 566 948 so‘m zarar yetkazilgan bo‘lib, shulardan bor yog‘i 55 000 000 so‘m pul jabrlanuvchilarga qaytarilgan holos.Bu esa mazkur turdagi jinoyatlarga qarshi kurashishda barcha fuqarolarimizdan ogohlikni, xushyorlikni talab qiladi. 
Hurmali shahrimiz aholisi sizlarni quyida ayrim firibgarlik usullari haqida ogohlantirib o‘tmoqchiman:

1. O‘zini «bank xodimi» deb tanishtirgan shaxslar:
Noma’lum raqamdan qo‘ng‘iroq qilib, sizga imtiyozli kredit, fond mablag‘i, yoki pensiya tayinlash haqidagi yolg‘on va’dalar bilan sizning shaxsiy ma’lumotlaringizni so‘rashlari mumkin. Unutmang — hech qachon telefon orqali pasport raqami, plastik karta ma’lumotlari, yoki yuz tasviringizni hech kimga yubormang. Bu — firibgarlik!

2. Shubhali ijtimoiy tarmoqlardagi xabarlar:
Telegram va boshqa tarmoqlarda «Bu sizmisiz?», «Sud qarori siz haqingizda chiqdi», «Mashina yutdingiz» kabi xabarlar orqali sizni bosim ostiga olishga apk kengaytmali fayllar yoki linklarga kirishga undashadi. Bu xabarlar orqali qurilmangizga zararli dastur o‘rnatilishi yoki shaxsiy ma’lumotlaringiz o‘g‘irlanishi mumkin.

3. Soxta raqamlar va sovg‘a va’dalari:
Firibgarlar o‘z raqamlarini yirik tashkilotlar yoki xizmatlar raqamlariga o‘xshatib, sizga «yutuq yutib oldingiz» yoki “chet elda ish bilan ta’minlaymiz” kabi xabarlar yuborishadi. Maqsad — sizning bank kartangizga, shaxsiy identifikatsiyangizga kirib olish va undan keyin nafaqat pulingizni, balki nomingizdan kredit olishgacha borishadi.

Sizdan iltimos qilamiz:
 • Bunday holatlarda suhbatni darhol yakunlang.
 • Zudlik bilan 102 raqamiga murojaat qiling va holat haqida xabar bering.
 • Har qanday shubhali holat yuzasidan ichki ishlar organlariga xabardor qiling. Biz sizning murojaatingiz asosida zarur choralarni ko‘ramiz.

Shuningdek, sizga zararli havolalarni aniqlovchi va oldini oluvchi @xviib_bot Telegram botidan foydalanishingizni tavsiya qilamiz. Bu vosita sizni va yaqinlaringizni firibgarlarning ko‘zbo‘yamachiliklaridan himoya qiladi.

Hurmatli yurtdoshlar!

Mahallamiz osoyishtaligini ta’minlash — hammamizning burchimiz. Jinoyatlarga qarshi birgalikda kurashaylik, ogoh va hushyor bo‘laylik.

O‘z uyimiz, o‘z mahallamiz, o‘z tumanimiz — o‘z qo‘limizda!

Hurmat bilan, 
Urganch shahar IIB boshlig‘i
polkovnik                                  G‘.M.Sharipov