Xorazm viloyati Urganch shahri hokimligi

Mamlakatimizda davlat tilining nufuzi va obro‘sini oshirish, uni hayotning barcha jabhalarida to‘laqonli qo‘llash masalasi doimiy e’tiborda bo‘lib kelmoqda. Shu maqsadda Urganch shahrida ham davlat tili qoidalariga amal qilinishini ta’minlash bo‘yicha tizimli ishlar amalga oshirilmoqda.

Savdo va xizmat ko‘rsatish sohasidagi o‘zgarishlar

Shahardagi do‘konlar, xizmat ko‘rsatish maskanlari, reklama bannerlari va e’lonlar holati o‘rganildi. Tahlillar shuni ko‘rsatdiki, ayrim yozuvlar davlat tili me’yorlariga mos kelmasdan, xorijiy til elementlari ustuvor qo‘llangan. Mazkur kamchiliklarni bartaraf etish bo‘yicha tegishli choralar ko‘rilib, reklama va tashqi yozuvlar davlat tilidagi to‘g‘ri imlo qoidalariga moslashtirildi.

Idora va tashkilotlardagi ish yuritish

Davlat tilining rasmiy doiralarda qo‘llanishi ham alohida nazoratga olindi. Idora va tashkilotlarda yuritilayotgan hujjatlar tili o‘rganildi. O‘rganishlar davomida ayrim joylarda rus tilidan ortiqcha foydalanish, rasmiy uslubdagi turg‘un qoida va me’yorlarga rioya qilinmagan holatlar aniqlangan. Bunday kamchiliklar bo‘yicha mas’ullarga tushuntirish ishlari olib borilib, hujjatlarni davlat tilida to‘g‘ri yuritish yuzasidan ko‘rsatmalar berildi.

Amalga oshirilgan chora-tadbirlar natijasi

Olib borilgan targ‘ibot-tashviqot ishlari natijasida shahardagi ko‘plab reklama bannerlari, tashqi yozuvlar va hujjatlarda davlat tili qoidalariga rioya etish darajasi oshdi. Bu esa nafaqat til madaniyatini, balki shahar obodonchiligi va estetik qiyofasini ham yaxshilashga xizmat qilmoqda.

Davlat tilining hayotimizda to‘laqonli qo‘llanishi — milliy o‘zligimiz, ma’naviy qadriyatimiz va mustaqilligimiz ramzidir. Urganch shahrida olib borilgan mazkur ishlar tilimizning obro‘-e’tiborini oshirish yo‘lidagi muhim qadamlardan biridir. Kelgusida ham bu boradagi ishlar izchil davom ettirilishi, har bir tashkilot va fuqaro davlat tiliga yuksak hurmat va mas’uliyat bilan yondashishi zarur.

Urganch shahar hokimi maslahatchisi Feruza Omonboyeva