Toshkent vilоyati hоkimligi

Toshkent viloyati hokimi Zoyir Mirzayevning 
Fuqarolik jamiyati haftaligi munosabati bilan fuqarolik jamiyati institutlari vakillariga 

      MUROJAATNOMASI
 

Hurmatli fuqarolik jamiyati institutlari va nodavlat notijorat tashkilotlari vakillari!

Sizlarni Toshkent viloyati hokimligi nomidan Fuqarolik jamiyati haftaligi munosabati bilan samimiy muborakbod etaman!

Bugun mamlakatimizda demokratiya tamoyillariga asoslangan, ochiq va xalq xizmatidagi davlat boshqaruvi tizimini shakllantirishda fuqarolik jamiyatining o‘rni beqiyos ahamiyat kasb etmoqda. Sizlarning faolligingiz, tashabbuskorligingiz va jamiyat manfaatlarini ilgari surishdagi fidokorligingiz tufayli yurtimizda davlat va jamoatchilik o‘rtasidagi ishonch va hamkorlik muhiti tobora mustahkamlanmoqda.

Toshkent viloyatida so‘nggi yillarda fuqarolik jamiyati vakillari tomonidan jamoatchilik nazoratini amalga oshirish, aholining ijtimoiy faolligini kuchaytirish va mahalla darajasidagi tashabbuslarni qo‘llab-quvvatlash yo‘nalishida salmoqli ishlar amalga oshirilmoqda. 

Nodavlat notijorat tashkilotlari tomonidan suv ta’minoti, yo‘l infratuzilmasi, atrof-muhit muhofazasi, nogironligi bo‘lgan shaxslar huquqlarini himoya qilish kabi sohalarda amaliy loyihalar yo‘lga qo‘yilgani e’tirofga loyiq.

Bugungi kunda fuqarolik jamiyati institutlari nafaqat muammolarni ko‘tarayotgan, balki ularning yechimini ham taklif etayotgan kuchli ijtimoiy sherikka aylandi. Bu — zamon talabiga mos faol pozisiya, jamiyat taraqqiyotiga hissa qo‘shishning eng ta’sirchan yo‘lidir.

Hurmatli fuqarolik jamiyati institutlari vakillari! 

Sizlarning fikringiz, tashabbusingiz va amaliy faolligingiz viloyatimiz hayotida katta ahamiyat kasb etadi. Shu bois, biz barcha darajadagi davlat idoralari bilan ochiq muloqot maydonlarini kengaytirish, jamoatchilik fikrini inobatga olish va qaror qabul qilish jarayonida fuqarolik jamiyati institutlarini faol ishtirok ettirishni ustuvor vazifa deb bilamiz.
Hokimlik sizlarning ijtimoiy loyihalaringizni amalga oshirish, yangi g‘oyalaringizni hayotga tatbiq etish va aholi manfaatlariga xizmat qiladigan tashabbuslaringizni ro‘yobga chiqarishda doimo yordamchi bo‘lib qoladi.

Siz tomoningizdan olib borilayotgan faoliyat — bu faqat jamoatchilik xizmati emas, balki inson qadrini ulug‘lash, xalq ishonchini oqlash va Vatan ravnaqiga hissa qo‘shish yo‘lidagi ezgu harakatdir.

Shu munosabat bilan barchangizni Fuqarolik jamiyati haftaligi bilan tabriklar ekanman, faoliyatingizda yangi g‘alabalar, yuksak zafarlar va ijtimoiy hamjihatlik tilayman.
Ishonchim komilki, yurtimizning har bir go‘shasida fuqarolik jamiyatining faol, mas’ul va tashabbuskor vakillari bor ekan, islohotlar samarasi yanada yuksak bo‘ladi.
Kuchli fuqarolik jamiyati — kuchli davlatning poydevoridir!