Keksalarimizning mazmunli  hayot yo‘llari el-yurtga muhabbat va sadoqat, mardlik va fidoyilik namunasi sifatida hamisha barchamiz uchun ibrat maktabidir. 

Yurtimizda Prezidentimiz rahnamoligida olib borilayotgan xalqchil siyosat zamirida hayotimizning fayzi, yosh avlodning duogo‘yi bo‘lgan, ko‘pni ko‘rgan nuroniylarimizga alohida hurmat-ehtirom, e’tibor va g‘amxo‘rlik ko‘rsatishdek oliyjanob vazifalar alohida o‘rin tutadi.

Davlatimiz rahbari tomonidan 2016 yil 28 dekabrda mamlakatimizning turli sohalarida ko‘p yillar davomida halol va samarali mehnat qilgan, hayotini oilalar mustahkamligini saqlash, farzandlarimizni jamiyat oldida mas’uliyat, milliy va umuminsoniy qadriyatlarga, kattalarga va yosh avlod vakillariga hurmat, ona-Vatanga muhabbat, istiqlol g‘oyalariga sadoqat ruhida tarbiyalash ishlariga bag‘ishlagan otaxon va onaxonlarni munosib taqdirlash maqsadida “Mehnat faxriysi” ko‘krak nishoni ta’sis etilib, har yili o‘z munosib egalariga topshirib kelinmoqda. 

Bu yil ham viloyatimizning 72 nafar mehnat faxriylari ushbu nishon bilan taqdirlandilar. 

Bugun Nurafshon shahrida mukofotlarni topshirishga bag‘ishlangan marosim bo‘lib o‘tdi. Tadbirda Toshkent viloyati hokimi Zoyir Mirzayev ishtirok etib, keksa avlod vakillarini yuksak e’tirof bilan samimiy qutladi. 

Marosim dasturiga muvofiq, dastlab nuroniylarimiz Nurafshon shahridagi “Vatanparvar” bog‘ini ziyorat qilishdi. Keksa avlod vakillarining el-yurtimiz tinchligi va osoyishtaligi yo‘lidagi ulkan jasoratlarini aks ettiruvchi bu bog‘ va undagi ekspozisiyalar barchada katta taassurot qoldirdi. 

Shundan so‘ng shu yerga yondosh manzilda joylashgan sadoqat va matonat ramzi — Zulfiya Zokirova monumenti poyiga gulchambar qo‘yildi. 

Nuroniy otaxonu onaxonlar gurungi to‘kin dasturxon atrofida, san’atkorlarning kuy-qo‘shiqlari og‘ushida davom etdi.