Zamonaviy “Oila va xotin-qizlar maskani” foydalanishga topshirildi
2025-10-23 18:40:00 / Yangiliklar
Chirchiq shahrida zamonaviy, shinam va barcha talablarga mos "Oila va xotin-qizlar maskani" ish boshladi. Shu munosabat uning ochilish marosimi bo‘lib o‘tdi. Unda Oʻzbekiston Respublikasi Bosh vaziri oʻrinbosari – Oila va xotin-qizlar qoʻmitasi raisi Z. Mahkamova, viloyat hokimi o‘rinbosari, Oila va xotin-qizlar boshqarmasi boshligʻi N. Normirzayeva, Xalq deputatlari Toshkent viloyati kengashi raisi S. Fayziyeva hamda Chirchiq shahar hokimi Murodjon Abduraximov ishtirok etdi.
Mazkur maskanni bunyod etishdan ko‘zlangan asosiy maqsad – oilaviy munosabatlarda barqaror muhitni ta’minlash, xotin-qizlar va yosh oilalarni har tomonlama qo‘llab-quvvatlash, ularning ijtimoiy faolligi hamda iqtisodiy mustaqilligini mustahkamlashdan iborat.
Bu yerda nikohlanuvchi yoshlar, yosh oilalar va nizoli oilalar uchun maxsus psixologik, huquqiy va tibbiy maslahatlar beriladi. Shuningdek, xotin-qizlarning tadbirkorlik sohasidagi bilim va ko‘nikmalarini oshirish, milliy liboslarni targ‘ib etish bo‘yicha o‘quv kurslari va ko‘rgazmalar tashkil etiladi.
Maskan huzurida “Sog‘lom ona – sog‘lom bola”, “Yoshlarni oilaviy hayotga tayyorlash”, “Xotin-qizlar bandligini ta’minlash”, “Oilaviy ajrimlarning oldini olish” kabi yo‘nalishlarda maxsus kunlar joriy etilgan. Ushbu tadbirlar doirasida oilalar bilan individual ishlash, mediatsiya va korreksion dasturlar orqali muammolarni hal etish nazarda tutilgan.
Yangi markazda tadbirkorlikni boshlayotgan xotin-qizlarga amaliy ko‘mak ko‘rsatish, elektron tijorat imkoniyatlarini o‘rgatish hamda ustoz-shogird an’analari asosida master-klasslar o‘tkazish rejalashtirilgan.