27 milliard dollarlik istiqbol: yangi aeroport O‘zbekistonni mintaqaviy aviatsiya markaziga aylantiradi

Xabaringiz bor, Toshkent viloyatining O‘rta Chirchiq va Quyi Chirchiq tumanlarining tutash hududida zamon talablariga mos yangi xalqaro aeroport qurilishi rejalashtirilgan. Joriy yilning 20 oktyabr kuni Prezident Shavkat Mirziyoyev mazkur ulkan loyihaga start berdi. “O‘zbekistonni sharq va g‘arb, shimol va janubni bog‘lovchi yirik aviatsiya xabiga aylantirishni maqsad qilganmiz” dedi Prezident loyiha taqdimotida. 

Xo‘sh, bunday katta xalqaro aeroport o‘zi nima uchun muhim? Nega aynan Toshkent viloyati hududi tanlab olindi?

Birinchidan, mazkur xalqaro darajadagi aeroport zamonaviy talablarga javob beradigan, logistik va iqtisodiy jihatdan muhim, mamlakatning xalqaro aviatsiya pozisiyasini mustahkamlaydigan loyihadir. Ushbu aeroport aviatsiya xizmatlari sifatini oshirish, parvozlar xavfsizligini ta’minlash, texnik jihatdan tartibga solish bo‘yicha Xalqaro fuqaro aviatsiyasi tashkilotining talablariga to‘liq javob beradi.

Ikkinchidan, bugun mamlakatimizga xorijiy sayyohlar soni tobora oshib bormoqda. Agar raqamlarga yuzlanadigan bo‘lsak, so‘nggi yillarda turistlar soni 3 barobar, aniqrog‘i, 3 mln.dan 10 mln.ga ko‘paydi. 2030 yilga borib bu ko‘rsatkich 15 mln., 2040 yilgacha esa 24 mln. bo‘lishi prognoz qilinmoqda. Biroq yiliga 11 million odamga xizmat ko‘rsatadigan hozirgi aeroport shahar hududida joylashgani uchun uni kengaytirishning hech imkoni yo‘q. Shuning uchun ham sohadagi qator yetakchi xorijiy ekspertlar va jamoatchilik vakillari bilan muhokama qilinib, Toshkent viloyati hududi tanlab olindi. 

Uchinchidan esa, mazkur yirik loyiha sohada katta natijalarga erishgan dunyoning yetakchi Holdinglari, xususan, Saudiya Arabistonining “Vision Invest”, Yaponiyaning “Sojitz” va Koreyaning “Incheon” kompaniyalari tomonidan qurilishi rejalashtirilgan. Birgina aviatsiya sohasida qariyb 25 yillik tajribaga ega janubiy Koreyaning “Incheon” kompaniyasi bugungacha dunyoning 18 ta mamlakatida 40 ga yaqin xuddi shunday loyihalarni muvaffaqiyatli amalga oshirgan. 

Mazkur xalqaro aeroport qurilishi 4 bosqichdan iborat bo‘lib, dastlab 2,5 milliard dollar evaziga aerovokzal hamda aerodrom bunyod etiladi. Bu bilan terminallar orqali yiliga 20 million nafar yo‘lovchi va 129 ming tonna yuk o‘tkazish, soatiga 30 ta uchish-qo‘nish operatsiyalarini bajarish, 14 ta teleskopik traplardan foydalanish hamda bir vaqtning o‘zida 62 ta havo kemasini saqlash imkoniyati yaratiladi.

Bu loyiha “yashil” standart tamoyillariga javob beradigan mintaqadagi birinchi aeroport bo‘ladi. Shuningdek, u iqtisodiy jihatdan ham davlat uchun jozibador bo‘lib, bu loyiha mamlakatimizga 27 milliard dollardan ortiq daromad keltiradi.