Toshkent vilоyati hоkimligi

Toshkent shahrida o‘tkazilayotgan xalqaro forumlar doirasida Xalqaro paxta maslahat qo‘mitasi, FAO, JST, UNIDO, UNCTAD va boshqa xalqaro tashkilotlar vakillari hamda xorijiy ekspertlar Bo‘ka tumanida hududning ilg‘or paxtachilik tajribasi bilan tanishdilar.

Xalqaro delegatsiya vakillarini Toshkent viloyati hokimining birinchi o‘rinbosari X. Qoraboyev, Bo‘ka tumani hokimi M. Abdazimov, viloyat Fermerlar kengashi raisi Sh. Do‘stbekov, tuman IIB boshlig‘i A. G‘ulomov hamda «Agroxizmatlar markazi» (AKIS) vakillari boshchiligidagi mas’ullar kutib oldi.

Dastlab delegatsiya a’zolari B. Umarov hududidagi «Yosh Sunnatilla» va «Azizova Shohida» fermer xo‘jaliklarining paxta maydonlarida bo‘lib, Xitoyning «Shin Lu Zong 87» va Ispaniyaning «Novella» navlari asosida yetishtirilgan paxta hosili bilan tanishdilar.

Mutaxassislar tomonidan mehmonlarga mazkur navlarning o‘ziga xos xususiyatlari, ularni yetishtirishda qo‘llanilayotgan agrotexnik tadbirlar, parvarishlash usullari hamda hosildorlik ko‘rsatkichlari haqida batafsil ma’lumot berildi. Xorijiy ekspertlar fermerlar bilan bevosita muloqot qilib, o‘zlarini qiziqtirgan savollarga javob oldilar.

Tashrifning amaliy qismi doirasida delegatsiya vakillari zamonaviy paxta terish kombayni yordamida hosilni yig‘ib olish jarayonini ham kuzatib, texnikaning imkoniyatlari va paxta terimida zamonaviy mexanizatsiyaning ahamiyatini ko‘zdan kechirishdi.

Shundan so‘ng mehmonlar Navoiy hududidagi «Xurram Rustam» fermer xo‘jaligining paxta maydoniga tashrif buyurib, plyonka ostida paxta yetishtirish texnologiyasi bilan tanishdilar. Ushbu usulning qo‘llanilishi, ekin parvarishidagi o‘ziga xos jihatlari va ishlab chiqarish samaradorligini oshirishdagi ahamiyati yuzasidan tushuntirishlar berildi.

Bo‘ka tumanida paxtachilikni rivojlantirish, xorijiy seleksiya navlarini amaliyotga tatbiq etish, zamonaviy agrotexnologiyalardan foydalanish va hosildorlikni oshirish borasida to‘plangan tajriba xalqaro delegatsiyada katta qiziqish uyg‘otdi.