Assalomu alaykum, qadrli chirchiqliklar!

Hurmatli mehmonlar!

Avvalo, barchangizni bugungi qutlug‘  tuhfa — Chirchiq shahrida barpo etilgan zamonaviy 24/7 ko‘chasi, obodlik va farovonlikning yangi manzili bilan samimiy muborakbod etaman.

Bugun biz bu ko‘cha timsolida Yangi O‘zbekistonning taraqqiyot falsafasini, inson manfaatini va zamonaviy shaharsozlik madaniyatini o‘zida mujassam etgan yana bir go‘zal maskanni xalqimizga taqdim etmoqdamiz.

Muhtaram Prezidentimiz Shavkat Mirziyoyev rahbarligida amalga oshirilayotgan islohotlarning bosh maqsadi — inson qadrini ulug‘lash, aholimiz uchun munosib turmush sharoitini yaratishdir. Bugungi kunda shaharlarimiz va qishloqlarimizda barpo etilayotgan har bir yo‘l, har bir bog‘, har bir xiyobon, har bir ijtimoiy ob’yekt, eng avvalo, inson uchun, uning farovon va baxtli hayoti uchun xizmat qilmoqda.

Mana shu ezgu g‘oyalarning amaliy ifodasi sifatida viloyatimizning barcha tuman va shaharlarida "Drayver" loyihalari bosqichma-bosqich amalga oshirilmoqda.

Joriy yilda viloyatimizda jami 54 ta loyihasini amalga oshirish rejalashtirilgan. Ushbu loyihalar orqali hududlarning iqtisodiy salohiyatini yuksaltirish, aholiga yanada qulay va zamonaviy muhit yaratish, tadbirkorlikni qo‘llab-quvvatlash hamda yangi ish o‘rinlarini tashkil etishga alohida e’tibor qaratilmoqda.

Ushbu maqsadlarni amalga oshirish uchun 110 milliard 500 million so‘m byudjet mablag‘lari yo‘naltirilmoqda. Eng muhimi, mazkur loyihalar natijasida 6 ming 220 ta yangi ish o‘rni yaratiladi. Bu esa yuzlab oilalarning daromadi va farovonligini oshirishga xizmat qiladi.

Shu bilan birga, amalga oshirilayotgan loyihalar hisobidan byudjetga 97 milliard 400 million so‘m qo‘shimcha tushumlar ta’minlanishi kutilmoqda.

Bu esa hududlarni yanada obod qilish, yangi ijtimoiy ob’yektlarni barpo etish va aholiga ko‘rsatilayotgan xizmatlar sifatini oshirish uchun mustahkam moliyaviy asos yaratadi.

Birgina misol davlatimiz rahbari Shavkat Mirziyoyev kuni kecha O‘rta Chirchiq tumanidagi Qorasuv kanali bo‘yida amalga oshirilgan bunyodkorlik ishlari bilan tanishib, mazkur loyihani hududlarni kompleks rivojlantirish, aholi uchun zamonaviy va qulay jamoat maskanlarini yaratish borasidagi namunaviy tashabbus sifatida yuqori baholadilar.

Siz guvohi bo‘lib turgan – qisqa vaqt ichida avval qarovsiz ahvolga kelib qolgan Chirchiq shahridagi bu hudud ham bugun butunlay yangi qiyofa kasb etdi.

Bu yerda piyodalar uchun qulay yo‘laklar, dam olish maskanlari, favvoralar, yashil zonalar, bolalar o‘yingohlari, sport maydonchalari, fotozonalar, yashil hududlar va kechayu kunduz xizmat ko‘rsatadigan savdo hamda servis ob’yektlari tashkil etildi.

Loyihaning birinchi bosqichida “Quyosh” mahallasi hududidagi yaroqsiz holatga kelib qolgan xiyobon to‘liq rekonstruksiya qilinib, Amir Temur shoh ko‘chasining 750 metr qismida 24/7 rejimida faoliyat yuritadigan hudud tashkil etildi. Bu ishlar uchun respublika byudjeti hisobidan qariyb 3 milliard so‘m mablag‘ yo‘naltirildi.

Natijada 1 700 kvadrat metrdan ortiq hududga zamonaviy qoplama yotqizildi, ikkita favvora, bolalar maydonchasi, workout zonasi, o‘nlab o‘rindiqlar, chiqindi qutilari, lazerli yoritish tizimi, keng piyodalar yo‘laklari va ko‘kalamzor hududlar barpo etildi.

Loyihaning ikkinchi bosqichida esa ushbu hudud yanada kengaytirildi. Buning uchun qo‘shimcha 15 milliard so‘m mablag‘ ajratildi. Zamonaviy besedkalar, stellalar, fotozona, yangi lazerli yoritish tizimlari, irrigatsiya tarmoqlari, dekorativ ariqlar va qo‘shimcha piyodalar yo‘laklari qurildi. Atrof muhitni yanada ko‘rkamlashtirish maqsadida 3 ming tup gul va 300 tup archa ko‘chatlari ekildi.

Eng muhimi, bu loyiha natijasida yuzlab yangi ish o‘rinlari yaratildi, o‘nlab yangi tadbirkorlik sub’yektlari faoliyati yo‘lga qo‘yildi. Xususan, bu yerda o‘nta yangi tadbirkorlik sub’yekti tashkil etildi. Rejada 230 ta yangi ish o‘rni yaratish belgilangan bo‘lsa, amalda 332 ta yangi ish o‘rni tashkil etishga erishildi. Shuningdek, rejalashtirilgan 35 ta savdo va xizmat ko‘rsatish ob’yekti o‘rniga 43 ta zamonaviy ob’yekt faoliyati yo‘lga qo‘yildi.

Demak, bu ko‘cha nafaqat chiroyli maskan, balki iqtisodiy faollik, yangi imkoniyatlar va aholi bandligini ta’minlaydigan muhim hudud hamdir.

Aziz yurtdoshlar!

Barchamiz eng ulug‘ va eng aziz bayramimiz — O‘zbekiston Respublikasi davlat mustaqilligining 35 yilligini munosib kutib olish arafasida turibmiz.

Mana shunday bunyodkorlik ishlari, xalqimiz uchun yaratilayotgan yangi imkoniyatlar, zamonaviy shaharlar, obod mahallalar mustaqilligimizning eng munosib tuhfasi, eng go‘zal bayram sovg‘asidir.

Bugun nafaqat Chirchiq, balki butun Toshkent viloyati ulkan o‘zgarishlar davrini boshdan kechirmoqda.

Kuni kecha muhtaram Prezidentimiz Shavkat Mirziyoyevning viloyatimiz markazi — Nurafshon shahriga tashrif buyurib, bir qator yirik qurilish va infratuzilma loyihalariga start berganlari bu taraqqiyot jarayonlarining yanada yuqori bosqichga ko‘tarilayotganidan dalolat beradi.

Bu yuksak e’tibor biz uchun katta ishonch, katta mas’uliyat va yangi marralar sari dadil intilish demakdir.

Qadrli chirchiqliklar!

Ishonamanki, bugun foydalanishga topshirilayotgan ushbu zamonaviy ko‘cha shahrimizning eng sevimli maskanlaridan biriga aylanadi. Bu yerda farzandlarimiz quvonch bilan vaqt o‘tkazadi, yoshlarimiz sport bilan shug‘ullanadi, oilalarimiz dam oladi, tadbirkorlarimiz esa yangi g‘oya va tashabbuslarini ro‘yobga chiqaradi.

Barpo etilayotgan har bir inshoot, har bir go‘zal maskan xalqimiz farovonligi, yurtimiz taraqqiyoti va kelajak avlodlar baxti uchun xizmat qilsin!

Barchangizni yana bir bor ushbu quvonchli voqea bilan chin qalbimdan tabriklayman.

Yurtimiz tinch, xalqimiz omon, mustaqilligimiz abadiy bo‘lsin!

E’tiboringiz uchun rahmat!