Toshkent vilоyati hоkimligi

Toshkent viloyati va Koreya Respublikasining Kyongido provinsiyasi o‘rtasida tibbiyot sohasidagi hamkorlik yangi bosqichga ko‘tarilmoqda.

7–11 sentyabr kunlari viloyat hokimi o‘rinbosari Otabek Sultonbekov boshchiligidagi sog‘liqni saqlash tizimi mas’ullaridan iborat delegatsiyaning Kyongido provinsiyasiga amaliy safari davomida zamonaviy tibbiyotning ilg‘or yo‘nalishlari o‘rganilib, muhim kelishuvlarga erishildi.

Delegatsiya a’zolari Sent-Vinsent gospitali, Koreya universitetining Ansan gospitali, Shixva tibbiy markazi hamda tibbiy uskunalar sohasidagi markazlar faoliyati bilan tanishdi.

Xususan, sun’iy intellekt va intellektual tibbiyot, robotlashtirilgan onkologiya, zamonaviy diagnostika, yurak-qon tomir kasalliklarini davolash, tibbiy texnologiyalar va mutaxassislarni tayyorlash tajribasi o‘rganildi.

Shuningdek, «Kyongido – O‘zbekiston» MedTech biznes-forumida Toshkent viloyatidagi Nurafshon tibbiy klasteri taqdimoti o‘tkazilib, tibbiy uskunalar ishlab chiqaruvchi kompaniyalar bilan hamkorlik istiqbollari muhokama qilindi.

«Kyongido – O‘zbekiston tibbiyot istiqbollari» forumi doirasida esa Toshkent viloyati Sog‘liqni saqlash boshqarmasi hamda Kyongido provinsiyasining yetakchi tibbiyot muassasalari o‘rtasida 3 ta o‘zaro hamkorlik memorandumi imzolandi.

Kelishuvlarga ko‘ra, Nurafshon shahridagi Ko‘p tarmoqli tibbiyot markazi faoliyatini tashkil etishda amaliy yordam ko‘rsatish, neyroxirurgiya, kardioxirurgiya, neonatal xirurgiya, transplantologiya, angioxirurgiya, umurtqa va bo‘g‘imlarni protezlash hamda onkologiya yo‘nalishlarida mutaxassislarni Kengidoning yetakchi tibbiyot muassasalarida bepul malaka oshirish kurslariga jalb etish ko‘lamini kengaytirish belgilandi.

Bundan tashqari, koreyalik mutaxassislar ishtirokida Toshkent viloyatida o‘rta tibbiyot xodimlari uchun sayyor o‘quv kurslarini tashkil etish hamda 2027 yilda viloyatda Kengidoning yetakchi tibbiyot muassasalari professorlari ishtirokida ilmiy-amaliy konferensiya o‘tkazish bo‘yicha kelishuvlarga erishildi.