Toshkent tumanida “Vosiq” Xalqaro maktabining yangi filiali faoliyat boshladi
2026-09-02 14:35:00 / Yangiliklar
Toshkent tumanida yangi o‘quv yili munosib tuhfalar bilan boshlandi. Tumanning "Tutzor" mahallasida “Vosiq” Xalqaro maktabining yangi ta’lim va maktabgacha ta’lim majmuasi foydalanishga topshirildi.
Yangi o‘quv maskanining ochilishiga bag‘ishlangan tadbirda Toshkent viloyati hokimi Zoyir Mirzayev, tuman hokimi Sardorbek Ergashev, ta’lim sohasi vakillari, ustozlar, ota-onalar, o‘quvchilar hamda jamoatchilik vakillari ishtirok etdi.
Ta’kidlanganidek, mamlakatimizda “Yangi O‘zbekiston – maktab ostonasidan boshlanadi” degan ezgu g‘oya asosida ta’lim tizimini sifat jihatidan yangi bosqichga olib chiqish, zamonaviy va raqobatbardosh ta’lim muhitini yaratishga alohida e’tibor qaratilmoqda.
"Tutzor" mahallasida barpo etilgan mazkur majmua ham ana shu islohotlarning amaliy ifodalaridan biridir. Muassasaning o‘ziga xos jihati – maktab va maktabgacha ta’lim bosqichlarining yagona ta’lim muhitida birlashtirilganidir.
Majmuaning maktab qismi 1500 nafar o‘quvchiga, maktabgacha ta’lim qismi esa 360 nafar tarbiyalanuvchiga mo‘ljallangan. Demak, muassasa to‘liq quvvat bilan ishlaganda bir vaqtning o‘zida 1860 nafar bola uchun zamonaviy ta’lim-tarbiya olish imkonini yaratadi.
Bu yerda ta’lim jarayonida aniq va tabiiy fanlarga – matematika, fizika, kimyo va biologiyaga alohida e’tibor qaratiladi. Nazariy bilimlarni amaliy mashg‘ulotlar, tajribalar va laboratoriya ishlari bilan uyg‘unlashtirish orqali o‘quvchilarning mustaqil fikrlashi, tahlil qilishi, muammolarga yechim topishi va ilmiy xulosa chiqarish ko‘nikmalarini rivojlantirish ko‘zda tutilgan.
Maktabda tibbiyot yo‘nalishiga ham alohida urg‘u beriladi. Xususan, biologiya va kimyo fanlarini chuqur o‘zlashtirish, ularni amaliyot bilan bog‘lash orqali kelajakda tibbiyot sohasida tahsil olishni maqsad qilgan yoshlar uchun mustahkam poydevor yaratiladi.
Zamonaviy ta’limning muhim talablaridan biri bo‘lgan xorijiy tillarni o‘rganishga ham katta ahamiyat beriladi.
Yangi o‘quv yilining ilk kunida o‘z faoliyatini boshlagan “Vosiq” Xalqaro maktabining "Tutzor" filiali zamonaviy bilim, ilmiy tafakkur va yuksak maqsadlarga yo‘naltirilgan yangi imkoniyatlar eshigini ochdi.