Toshkent vilоyati hоkimligi

Bugun viloyat hokimi Zoyir Mirzayev Xitoy Xalq Respublikasining Anxoy provinsiyasi delegatsiyasi bilan uchrashdi.

Uchrashuvda Anxoy provinsiyasi Qishloq xo‘jaligi departamenti rahbari, provinsiya partiya kotibi Van Syueszyun boshchiligidagi mas’ullar qatnashdilar.

Toshkent viloyati va Anxoy provinsiyasi o‘rtasidagi hamkorlik so‘nggi yillarda izchil rivojlanib bormoqda. Xususan, 2023 yil dekabr, 2024 yil yanvar va iyun oylarida Toshkent viloyati delegatsiyalarining Anxoyga tashriflari amalga oshirilgan.

2024 yilda Anxoy provinsiyasi va Toshkent viloyati, shuningdek, Bochjou shahri va Piskent tumani o‘rtasida birodarlik aloqalarini o‘rnatish bo‘yicha kelishuvlar imzolandi. 2024 yil iyun oyida esa mazkur provinsiyada Toshkent viloyatining rasmiy vakolatxonasi ochildi.

Bugungi kunda Toshkent viloyatida xorijiy kapital ishtirokida ochilgan 3 ming 455 ta korxonaning 784 tasi Xitoy kapitali ishtirokidadir. E’tiborlisi, ularning 82 tasi aynan Anxoy provinsiyasi tadbirkorlari hamkorligidagi korxonalardir.

Anxoylik investorlar ishtirokida 2025 yilda viloyatga 402 million dollar, joriy yilning yetti oyida esa 286 million dollar to‘g‘ridan-to‘g‘ri xorijiy investisiya kiritilgan.

Uchrashuvda mavjud investisiya loyihalari bilan bir qatorda, qishloq xo‘jaligi sohasida yangi hamkorlik yo‘nalishlarini yo‘lga qo‘yish masalalariga alohida e’tibor qaratildi.

Jumladan, Anxoy provinsiyasining suv resurslarini boshqarish va suv tejovchi, zamonaviy sug‘orish texnologiyalarini Toshkent viloyatida keng joriy etish, “aqlli” va ekologik issiqxonalar tashkil qilish bo‘yicha qo‘shma loyihalarni amalga oshirish taklif etildi.

Shuningdek, iqlimga chidamli va yuqori hosildor meva-sabzavot navlarini yaratish bo‘yicha qo‘shma “In-vitro” laboratoriyalari va pitomniklar tashkil etish istiqbollari muhokama qilindi.

Tomonlar, shuningdek, Anxoyning agrobiotexnologiyalari va biologik preparatlarini Toshkent viloyati sharoitida sinovdan o‘tkazish va mahalliylashtirish, ipakchilik sohasida yangi texnologiyalarni joriy etish, xususan, pilla qurtlarini daraxtda ochiq havoda boqish usulini sinovdan o‘tkazish bo‘yicha hamkorlik qilishga qiziqish bildirdilar.

Kadrlar tayyorlash va ilmiy almashinuvlar ham hamkorlikning muhim yo‘nalishi sifatida qayd etildi.

Uchrashuv yakunida tomonlar Toshkent viloyati va Anxoy provinsiyasi o‘rtasidagi amaliy hamkorlikni, ayniqsa, qishloq xo‘jaligi, investisiya, innovatsiya va ta’lim sohalaridagi sheriklikni yanada kengaytirish, mavjud kelishuvlarni aniq loyihalar bilan boyitish muhimligini ta’kidladilar.