Toshkent vilоyati hоkimligi

Toshkent viloyati hokimining qishloq va suv xo‘jaligi masalalari bo‘yicha birinchi o‘rinbosari Xurshid Qoraboyev rahbarligida chorvachilik sohasida 2026-yilning birinchi yarmida amalga oshirilgan ishlar hamda yil yakuniga qadar bajarilishi lozim bo‘lgan vazifalarga bag‘ishlangan yig‘ilish o‘tkazildi.

Yig‘ilishda ta’kidlanganidek, joriy yilning birinchi yarmida viloyatda chorvachilik tarmog‘ini rivojlantirish, mahsulot ishlab chiqarish hajmini oshirish va aholini oziq-ovqat mahsulotlari bilan barqaror ta’minlash borasida tizimli ishlar amalga oshirildi.

Xususan, bugungi kunda viloyatda qoramollar soni 1 million boshdan oshgan, yarim yilda esa 166 ming tonna go‘sht va 564 ming tonna sut ishlab chiqarildi.
 

Shuningdek, sohaga investisiyalarni jalb qilish, naslchilikni rivojlantirish, yangi qayta ishlash quvvatlarini ishga tushirish, ozuqa bazasini mustahkamlash hamda gidroponika texnologiyalarini keng joriy etish bo‘yicha amalga oshirilayotgan ishlar tahlil qilindi.

Yig‘ilishda yil davomida qiymati 2 trillion so‘mlik 252 ta investisiya loyihasini amalga oshirish, zamonaviy go‘sht va sutni qayta ishlash quvvatlarini ishga tushirish hamda naslli chorva mollarini ko‘paytirish bo‘yicha belgilangan vazifalarning ijrosi muhokama qilindi.

Shuningdek, ozuqabop ekinlar maydonlarini kengaytirish, sun’iy urug‘lantirish ishlarini jadallashtirish, naslchilik xo‘jaliklari faoliyatini rivojlantirish, ichki bozorda go‘sht va boshqa chorvachilik mahsulotlari narx-navosining barqarorligini ta’minlash masalalariga alohida e’tibor qaratildi.

Yig‘ilish yakunida mas’ul rahbarlarga har bir investisiya loyihasining o‘z vaqtida ishga tushirilishi, chorvachilik mahsulotlari ishlab chiqarish hajmini yanada oshirish, aholini sifatli va arzon mahsulotlar bilan uzluksiz ta’minlash yuzasidan topshiriqlar berdi.