Zulfiyaxonimning yangi izdoshi — Dilnozaxonga davlatimizning yuksak mukofoti tantanali topshirildi
2026-07-14 18:40:00 / Yangiliklar
Xabaringiz bor, kuni kecha Bekobod shahriga tashrif davomida Prezidentimiz “O‘ZMETKOMBINAT” AJ quyuv-prokatlash majmuasining shijoatli mutaxassisi, iste’dod sohibasi Primqulova Dilnoza Farhod qizini “Zulfiya” nomidagi Davlat mukofoti bilan taqdirlash lozimligini aytgan edilar.
Bugun bu haqda Prezidentimizning tegishli Farmoni qabul qilindi.
Toshkent viloyati hokimligida mazkur yuksak mukofotni Dilnozaxonga tantanali topshirish marosimi bo‘lib o‘tdi.
Marosimda O‘zbekiston Respublikasi Oliy Majlisi Senati Raisi Tanzila Norboyeva, O‘zbekiston Respublikasi Bosh vaziri o‘rinbosari – Oila va xotin-qizlar qo‘mitasi raisi Dilnoza Kattaxonova, Toshkent viloyati hokimi Zoyir Mirzayev hamda keng jamoatchilik vakillari ishtirok etdi.
Tadbirda so‘zga chiqqanlar mamlakatimizda xotin-qizlarni har tomonlama qo‘llab-quvvatlash, ularning ilm-fan, ishlab chiqarish, tadbirkorlik va boshqa sohalardagi salohiyatini ro‘yobga chiqarish borasida amalga oshirilayotgan islohotlar o‘zining yuksak samaralarini berayotganini ta’kidladilar.
“Zulfiya” nomidagi Davlat mukofoti esa o‘z bilim va iste’dodi, mehnatsevarligi hamda tashabbuskorligi bilan tengdoshlariga o‘rnak bo‘layotgan qizlarni rag‘batlantirishda muhim ahamiyat kasb etishi qayd etildi.
Shuningdek, viloyat hokimi Zoyir Mirzayev mukofot sohibasi Dilnoza Primqulovani samimiy muborakbod etib, uning metallurgiya kabi murakkab va mas’uliyatli sohada fidokorona mehnat qilayotgani, kasbiy mahorati, izlanuvchanligi hamda erishayotgan yutuqlari yoshlar, ayniqsa, qizlar uchun munosib namuna ekanini alohida e’tirof etdi.
Bildirilgan yuksak ishonch va e’tibor har bir yoshni Vatanga sadoqat bilan xizmat qilish, o‘z ustida tinimsiz ishlash hamda yurt taraqqiyotiga munosib hissa qo‘shishga undashi ta’kidlandi.
Marosimning eng hayajonli lahzalarida Primqulova Dilnoza Farhod qiziga “Zulfiya” nomidagi Davlat mukofoti tantanali ravishda topshirildi.
Mukofot sohibasi o‘ziga bildirilgan yuksak ishonch va e’tibor uchun Prezidentimizga samimiy minnatdorlik bildirib, ushbu yuksak e’tirof zimmasiga yanada katta mas’uliyat yuklashini, bundan buyon ham metallurgiya sohasida sidqidildan mehnat qilib, yurt ravnaqi va xalq farovonligi yo‘lida bor bilim va salohiyatini safarbar etishini ta’kidladi.