Toshkent vilоyati hоkimligi

Bugun Nurafshon shahrida O‘zbekiston Jurnalistlar uyushmasi Toshkent viloyati bo‘limining 2022–2025 yillardagi faoliyatiga bag‘ishlangan hisobot yig‘ilishi bo‘lib o‘tdi.

Anjumanda uyushma a’zolari, viloyat, tuman va shahar gazetalari tahririyatlari bosh muharrirlari, faxriy jurnalistlar, yosh ijodkorlar hamda uyushma qoshida faoliyat yuritayotgan ijodiy to‘garaklar ishtirokchilari, viloyat boshqarma va tashkilotlarining axborot xizmatlarida faoliyat olib borayotgan jurnalistlar qatnashdilar.

Yig‘ilish kun tartibiga muvofiq, uyushmaning viloyat bo‘limi boshqaruvi raisi R. Sheraliyev hisobot davrida amalga oshirilgan ishlar, sohada erishilgan natijalar va kelgusidagi ustuvor vazifalar xususida axborot berdi. Shuningdek, taftish komissiyasi raisi, «Mash’al» gazetasi bosh muharriri o‘rinbosari T. Hakimov tashkilot mablag‘laridan foydalanish holati va samaradorligi yuzasidan hisobot taqdim etdi.

Yig‘ilishda uyushmaning boshqaruv a’zolari va taftish komissiyasining yangi tarkibi shakllantirildi. Shuningdek, O‘zbekiston Jurnalistlar uyushmasining respublika konferensiyasida ishtirok etadigan delegatlar saylandi.

Muhokamalar jarayonida O‘zbekiston xalq shoiri Mahmud Toir, faxriy jurnalistlar Ozod Xushnazarov va Hanifa Zokirova, «Toshkent haqiqati» va «Tashkentskaya pravda» gazetalari bosh muharriri To‘xtamurod Hasanboyev, «Mash’al» gazetasi bosh muharriri Otabek Isroilov, publisist va shoira Saodat Musayeva hamda boshqa ishtirokchilar so‘zga chiqib, viloyat bo‘limining to‘rt yillik faoliyati yuzasidan o‘z fikr va munosabatlarini bildirdilar.

Sohani yanada rivojlantirishga qaratilgan taklif va tashabbuslar ilgari surildi. Xususan, ijodiy to‘garaklar faoliyatini yanada jonlantirish, viloyat jurnalistlari antologiyasini yaratish ishlarini yakunlash, jurnalist va publisistlarning kitoblarini nashr etish hamda ularning taqdimotlarini tashkil etish, ustoz-shogird an’analarini mustahkamlash, uyushma safini iqtidorli va tashabbuskor yosh jurnalistlar hisobiga kengaytirish masalalari atroflicha muhokama qilindi.

Ta’kidlanganidek, bugungi kunda jurnalistikaning oldida turgan muhim vazifalardan biri — milliy matbuotning nufuzini oshirish, ijodkorlarni har tomonlama qo‘llab-quvvatlash va sohaga zamonaviy bilim hamda qarashlarga ega bo‘lgan yosh kadrlarni keng jalb etishdan iborat.

Hisobot yig‘ilishida kun tartibidagi barcha masalalar yuzasidan tegishli qarorlar qabul qilinib, kelgusi faoliyatning ustuvor yo‘nalishlari belgilab olindi.

Hisobot yig‘ilishida O‘zbekiston Jurnalistlar uyushmasi raisi vazifasini bajaruvchi Shuhrat Oripov so‘zga chiqdi.