Viloyatimiz xotin-qizlarining tadbirkorlik salohiyati Xitoyda ham namoyon bo‘lmoqda
2026-05-21 10:35:00 / Yangiliklar
Xitoy Xalq Respublikasining Shensi provinsiyasida O‘zbekiston–Xitoy hududlararo uchinchi forumi doirasida xotin-qizlar tadbirkorligini rivojlantirishga qaratilgan qator muhim tadbirlar o‘tkazilmoqda.
Mamlakatimiz delegatsiyasiga O‘zbekiston Respublikasi Bosh vaziri o‘rinbosari — Oila va xotin-qizlar qo‘mitasi raisi Zulayho Mahkamova boshchilik qilmoqda.
E’tiborlisi, mazkur nufuzli xalqaro tadbirlarda Toshkent viloyati hokimi o‘rinbosari, viloyat Oila va xotin-qizlar boshqarmasi boshlig‘i Nilufar Normirzayeva yetakchiligidagi ishbilarmon ayollar guruhi ham ishtirok etmoqda.
Kuni kecha delegatsiya Sian shahrida tashkil etilgan forum dasturi asosida bir qator uchrashuv va amaliy muloqotlarda qatnashdi.
Forumning asosiy maqsadi ikki davlat o‘rtasidagi savdo-iqtisodiy hamkorlikni yanada kengaytirish, hududlararo aloqalarni mustahkamlash hamda xotin-qizlar tadbirkorligini xalqaro bosqichga olib chiqishdan iborat.
Umuman, delegatsiya tarkibida Qoraqalpog‘iston Respublikasi, viloyatlar va Toshkent shahar oila va xotin-qizlar boshqarmalari rahbarlari, shuningdek turli sohalarda faoliyat yuritayotgan 58 nafar tadbirkor ayol ishtirok etmoqda. Ular orasida Toshkent viloyati vakilalarining ishtiroki ham alohida ahamiyat kasb etmoqda.
Tashrif davomida delegatsiya Shensi provinsiyasidagi “Mingta qishloq — o‘n mingta loyiha” namunaviy qishlog‘i faoliyati bilan tanishdi. Ushbu loyiha qishloq hududlarini rivojlantirish, jamoaviy tadbirkorlik va aholi bandligini ta’minlash borasidagi ilg‘or tajribalarni o‘zida mujassam etgan.
Shuningdek, delegatsiya zamonaviy raqamli qishloq xo‘jaligi parkida bo‘lib, “aqlli” qishloq xo‘jaligi texnologiyalari, dronlar yordamida boshqaruv, avtomatlashtirilgan sug‘orish tizimlari va innovasion yechimlar bilan yaqindan tanishdi.
Bu kabi tajribalarni Toshkent viloyatida ham tatbiq etish imkoniyatlari ko‘rib chiqildi.
Tashrif doirasida Shensi ayollar va bolalar markazi hamda qator yirik korxonalar faoliyati o‘rganildi. Xitoyda xotin-qizlarni qo‘llab-quvvatlash, ularning iqtisodiy faolligini oshirish va tadbirkorligini rag‘batlantirish bo‘yicha yo‘lga qo‘yilgan tizimli mexanizmlar ishtirokchilarda katta qiziqish uyg‘otdi.
Shu bilan birga, Shensi provinsiyasi Xalqaro savdoni rivojlantirish qo‘mitasi, Halol oziq-ovqat mahsulotlari assosiatsiyasi hamda Ayol yuristlar assosiatsiyasi bilan hamkorlik memorandumlari imzolanishi rejalashtirilgan.
O‘zbekiston–Xitoy hududlararo uchinchi forumi doirasidagi tadbirlar davom etmoqda. Ushbu muloqot va amaliy hamkorliklar Toshkent viloyatida xotin-qizlar tadbirkorligini rivojlantirish, ularning xalqaro bozorlarga chiqish imkoniyatlarini kengaytirishda muhim ahamiyat kasb etadi.