Toshkent vilоyati hоkimligi

Bugun Toshkent viloyati hokimligida 2026 yilning birinchi choragi yakunlari hamda yil oxiriga qadar ustuvor vazifalar muhokamasiga bag‘ishlangan kengaytirilgan faollar yig‘ilishi bo‘lib o‘tdi.
 

Yig‘ilishda viloyat hokimi o‘rinbosarlari, hokimlik guruh va kotibiyatlari rahbarlari, huquq-tartibot idoralari, boshqarma va tashkilotlar mutasaddilari, tuman va shahar hokimlari, sanoat zonalari, bank-moliya muassasalari va ommaviy axborot vositalari vakillari ishtirok etdi.
 

Yig‘ilish tanqidiy ruhda o‘tib, unda viloyat hokimi Zoyir Mirzayev keng qamrovli tahliliy ma’ruza qildi.
 

Asosiy e’tibor Prezidentimiz raisligida shu yil 24 aprel kuni hudud va tarmoqlarda iqtisodiy o‘sishni ta’minlash bo‘yicha birinchi chorak yakunlari tahlili va yil yakuniga qadar ustuvor vazifalar yuzasidan o‘tkazilgan videoselektor yig‘ilishida qayd etilgan kamchiliklarni bartaraf etish va belgilab berilgan galdagi vazifalar ijrosini so‘zsiz ta’minlashga qaratildi. Xususan, iqtisodiy o‘sishni ta’minlash, inflyasiyani jilovlash, ish o‘rinlari yaratish, eksportni ko‘paytirish, investisiya sifati va tadbirkorlar muammolarini hal qilish masalalari muhokama va munozara markazida bo‘ldi.
 

Qayd etilganidek, 2026 yil I chorakda viloyat iqtisodiyotida ijobiy o‘sish dinamikasi kuzatildi. Yalpi hududiy mahsulot 43,2 trln so‘mni tashkil etib, o‘sish sur’ati 7,6 foizga yetdi. Sanoat hajmi 42,9 trln so‘m bo‘lib, 7,8 foiz o‘sish ta’minlandi. Xizmatlar sohasi 19,8 trln so‘mga yetdi va 15,1 foizga o‘sdi. Qishloq xo‘jaligi 7,4 trln so‘m (+2,4%) , qurilish ishlari hajmi 6,6 trln so‘m (+7,3%) ni tashkil etdi.
 

Shuningdek, 709 mln dollarlik xorijiy investisiyalar o‘zlashtirilib, belgilangan reja 156 foizga bajarildi, eksport hajmi esa 337,7 mln dollarni tashkil etdi va 6 foizga o‘sdi .
 

Shu bilan birga, tahlillar ko‘rsatishicha, mavjud imkoniyatlar to‘liq ishga solinmayapti. Masalan, 8 ta hududda sanoat prognozlari bajarilmagan va 1 trln so‘mdan ortiq qiymat yaratilmay qolgan. 97 ta korxona to‘liq quvvatda ishlamagan. 40 ta korxonada ishlab chiqarish hajmi 1,4 trln so‘mga kamaygan.
 

Ayrim hududlarda sanoat shtablari samarasiz ishlayotgani, tadbirkorlar murojaatlari o‘z vaqtida hal etilmayotgani tanqid qilindi.
 

Viloyatda yillik inflyasiya 6,8 foizni tashkil etgan bo‘lsa-da, ayrim oziq-ovqat mahsulotlari narxlarining keskin oshishi kuzatilgan. Masalan, go‘sht mahsulotlari 14 foizgacha, sabzi 10 foizga, ayrim hududlarda esa piyoz
 

Yig‘ilishda investisiya va eksport yo‘nalishidagi jiddiy muammolar ham ko‘rsatib o‘tildi. 75 ta investisiya loyihasi bo‘yicha moliyalashtirish ochilmagan. Shuningdek, 11 ta loyihalar infratuzilmadagi muammolari sababli boshlanmagan. Viloyat bo‘yicha 2025 yilda 95,5 mln.dollar eksport qilgan 205 ta korxonada  eksport o‘tgan yilga nisbatan kamaygan
 

Zoyir Mirzayev o‘z nutqida energetika va kommunal sohadagi muammolarga ham alohida to‘xtaldi.
 

Xususan, Elektr energiyasi yo‘qotishlari 10 foizni tashkil etgan bo‘lsa-da, ayrim hududlarda bu ko‘rsatkich 20-23 foizga yetgani aytildi. Shuningdek, elektr energiyasi bo‘yicha qarzdorlik deyarli kamaymagan, tabiiy gaz bo‘yicha qarzdorlik esa respublikada eng yuqori darajada saqlanib qolmoqda. Mikro GES loyihalarini hayotga tadbiq etish borasidagi ishlar sust.
 

Yig‘ilishda ta’kidlanganidek, viloyatda iqtisodiy o‘sish uchun katta salohiyat mavjud. Biroq, mas’ullarda ijro intizomining talab darajasida bo‘lmayotgani,  rejalashtirish tizimi yetarli emasligi, rahbarlarda tashabbus va shaxsiy mas’uliyat yetishmayotgani muammolarning asosiy negizi sifatida qayd etildi.
 

Yig‘ilishda qator rahbarlar va mutasaddilarning mavjud vaziyatga izohi va hisobotlari tinglandi. Jumladan, Chinoz tumani hokimi Sherzod Salixov, Angren shahar hokimi Alisher Rayimov, Nurafshon shahar hokimi Ilhom Klichxanov, Bekobod shahar hokimi Nasrullo Boboyev, Toshkent tumani hokimi Sardor Ergashev, viloyat iqtisodiyot va moliya bosh boshqarmasi boshlig‘i o‘rinbosari Xumoyun Kulmanov, “Angren” erkin iqtisodiy zonasi direktori Gʻolibjon Eshmirzayev, “Hududgaz Toshkent” MCHJ direktori Jamshid Muhamedov, “O‘zenergoinspeksiya” viloyat boshqarmasi boshlig‘i Shuhrat Muhammedov, kichik sanoat zonalari direksiyasi rahbari Shohrux Shoahmedov va boshqalar birinchi chorak yakunlari bo‘yicha o‘z xulosalari va davlatimiz rahbari belgilab bergan vazifalar ijrosi yuzasidan harakat dasturlari haqida axborot berdilar.
 

Yig‘ilish yakunida birinchi chorak yakunlari bo‘yicha maqsadli ko‘rsatkichlar ta’minlanishida xato va kamchiliklarga yo‘l qo‘ygan viloyat tashkilotlari va hududiy mutasaddilarga qonunchilikda belgilangan tartibda intizomiy jazo ko‘rilishi ma’lum qilindi.