Toshkent vilоyati hоkimligi

Kecha Toshkent shahrida “INNOPROM. Markaziy Osiyo” VI xalqaro sanoat ko‘rgazmasi o‘z ishini boshladi. 
 

An’anaviy tarzda o‘tkazib kelinayotgan ushbu ko‘rgazma bu yil ham dunyoning turli mamlakatlaridan kelgan davlat vakillari, ishbilarmon doiralar, sanoat korxonalari rahbarlari va ekspertlarni bir maydonga jamladi.
 

Joriy yilgi forumda 35 davlatdan rasmiy delegatsiyalar va biznes vakillari ishtirok etmoqda. Ko‘rgazmada 500 dan ortiq kompaniya hamda ishlab chiqaruvchilar o‘z mahsulotlari, innovasion yechimlari va istiqbolli loyihalari bilan qatnashmoqda.
 

Qariyb 1,8 gektar hududda joylashgan ekspozisiya maydonlarida mashinasozlik, metallurgiya, elektrotexnika, kimyo sanoati, transport, qurilish materiallari, farmasevtika, axborot texnologiyalari, energetika va qishloq xo‘jaligi sohalariga oid yuzlab ishlanmalar namoyish etilmoqda.
 

Forum dasturi doirasida nafaqat ko‘rgazmalar, balki plenar yig‘ilishlar, sohaviy sessiyalar, davra suhbatlari, taqdimotlar va B2B formatidagi uchrashuvlar ham tashkil etilmoqda.
 

Ushbu muloqot maydonlarida Toshkent viloyati vakillari xorijiy ishtirokchilar, investorlar va hamkorlar bilan muzokaralar o‘tkazib, sanoat tarmoqlaridagi yangi tendensiyalar, istiqbolli investisiya loyihalari, texnologik yangiliklar hamda kooperatsiya imkoniyatlari yuzasidan fikr almashmoqda.
 

Forumning birinchi kunida viloyat hokimi Zoyir Mirzayev qatnashib, nufuzli mehmonlar, xorijiy investorlar va biznes vakillari oldida nutq so‘zladi.
 

Unda Toshkent viloyatining investisiyaviy salohiyati, hududda amalga oshirilayotgan sanoat islohotlari, zamonaviy ishlab chiqarish quvvatlari hamda eksport imkoniyatlari haqida atroflicha ma’lumot berildi. Shuningdek, hududning qulay geografik joylashuvi, rivojlangan transport-kommunikatsiya tarmoqlari va tadbirkorlik uchun yaratilgan shart-sharoitlar alohida ta’kidlandi.
 

Ko‘rgazma doirasida, xususan, Boshqirdiston  Respublikasi xamkorligida tashkil etilgan Bekobod texnoparkining maxsus ko‘rgazma zali ham tashkil etildi. Unda mahalliy korxonalar tomonidan ishlab chiqarilayotgan import o‘rnini bosuvchi mahsulotlar, eksportbop tovarlar, zamonaviy uskunalar va innovasion ishlanmalar namoyish qilinmoqda. Bekobod texnoparki ekspozisiyasi orqali hududda sanoatni mahalliylashtirish, texnologik yangilanish va yangi ish o‘rinlari yaratish bo‘yicha amalga oshirilayotgan ishlar keng jamoatchilikka taqdim etilmoqda.
 

Forum doirasida o‘tkazilayotgan uchrashuvlar va amaliy muzokaralar Toshkent viloyati uchun ham yangi hamkorlik yo‘nalishlarini ochib berishi kutilmoqda. Xususan, xorijiy sarmoyadorlar bilan qo‘shma korxonalar tashkil etish, yangi texnologiyalarni jalb qilish, eksport bozorlarini kengaytirish va sanoat kooperatsiyasini mustahkamlash bo‘yicha qator kelishuvlarga erishish ko‘zda tutilgan.
 

Forum 22 aprelgacha davom etadi.