Hokimlar hayratda — tashabbuskor yoshlar ijodiy va innovasion loyihalarini namoyish qilishdi
2026-04-02 15:35:00 / Yangiliklar
Haftaning payshanba sanasi — Yoshlar kuni munosabati bilan Toshkent viloyati hokimligida Zoyir Mirzayev boshchiligida yoshlarning startap va innovatsion g‘oyalariga bag‘ishlangan uchrashuv bo‘lib o‘tdi.
Kun tartibidagi asosiy mavzu yoshlar tomonidan ilgari surilayotgan istiqbolli loyihalarni tinglash, ularni qo‘llab-quvvatlash, amaliyotga tatbiq etish hamda tashabbuskor yoshlarni rag‘batlantirishga qaratildi.
Mazkur tadbirda barcha tuman va shahar hokimlari, bank tizimi vakillari, oliy ta’lim muassasalari rahbarlari hamda tegishli soha mutasaddilari ishtirok etdilar.
Ochiq muloqot shaklida tashkil etilgan uchrashuvda viloyatning turli hududlaridan tashrif buyurgan 50 nafar tashabbuskor yosh o‘zlarining istiqbolli startap loyihalari va innovatsion takliflarini taqdim etdilar.
Taqdim etilgan g‘oyalar axborot texnologiyalari, xizmat ko‘rsatish, ishlab chiqarish, qishloq xo‘jaligi, ta’lim, yoshlar tadbirkorligi va zamonaviy biznes yo‘nalishlarini o‘z ichiga oladi.
Har bir loyiha yoshlarning yangicha fikrlash qobiliyati, tashabbuskorligi va hududlarni rivojlantirishga bo‘lgan intilishlarini yaqqol namoyon etdi.
Tadbir davomida yoshlar o‘z startap loyihalarining maqsadi, iqtisodiy samaradorligi, amaliy ahamiyati, bozor talabi va kelgusidagi rivojlanish istiqbollari haqida batafsil ma’lumot berdilar.
Ayniqsa, yangi ish o‘rinlari yaratish, xizmatlar sifatini oshirish, mahalliy imkoniyatlardan samarali foydalanish hamda innovatsion yondashuvlarni hayotga tatbiq etishga qaratilgan g‘oyalarga alohida e’tibor qaratildi.
Uchrashuvda ishtirok etgan bank vakillari yoshlarning biznes va startap tashabbuslarini moliyaviy qo‘llab-quvvatlash, kredit va imtiyozli mablag‘lar ajratish, shuningdek, loyihalarni amaliy bosqichga olib chiqish mexanizmlari yuzasidan o‘z takliflarini bildirdilar.
Universitet rahbarlari esa ilmiy yondashuv, zamonaviy bilim va amaliy tajribani uyg‘unlashtirish orqali yoshlarning loyihalarini yanada takomillashtirish zarurligini ta’kidladilar.
Viloyat rahbari tomonidan har bir loyiha atroflicha tinglanib, istiqbolli tashabbuslarni qo‘llab-quvvatlash, yoshlarning biznes g‘oyalarini ro‘yobga chiqarish, hududlar kesimida manzilli ishlash hamda ularning bandligini ta’minlash borasida mutasaddilarga tegishli topshiriqlar berildi.
Ta’kidlanganidek, yoshlarning tashabbus va g‘oyalarini qo‘llab-quvvatlash, ularni amaliy loyihalarga aylantirish hamda tadbirkorlikka keng jalb etish bugungi kunning ustuvor vazifalaridan biridir.