Toshkent vilоyati hоkimligi

Toshkent viloyati hokimi Zoyir Mirzayev raisligida o‘tkazilgan videoselektor yig‘ilishida bugungi kunning eng dolzarb masalalaridan biri — “Yashil makon” umummilliy loyihasining bahorgi mavsumi doirasida amalga oshirilayotgan ishlar tahlili atroflicha muhokama qilindi.
 

Yig‘ilish tahliliy-tanqidiy ruhda o‘tib, joylardagi ishlarning bugungi holati chuqur ko‘rib chiqildi. 
 

Qayd etilganidek, joriy yilda viloyatda ko‘klamgi mavsum doirasida salkam 7 million tup atrofida daraxt va buta ko‘chatlari ekish rejalashtirilgan. 
 

Bu, shubhasiz, hududlarda ekologik muhitni yaxshilash, aholi uchun qulay yashash sharoitlarini yaratish va yashil hududlar ulushini oshirishda muhim ahamiyat kasb etadi.
 

Shu bilan birga, yig‘ilishda faqat ko‘chat ekish emas, balki ularni parvarishlash, o‘z vaqtida sug‘orish va saqlab qolish masalalariga alohida urg‘u berildi. 
 

Ekilgan har bir daraxtning sog‘lom o‘sishi uchun tizimli yondashuv talab etiladi. Ko‘chat ekishdan osoni yo‘q, eng katta masala ekilgan ko‘chatlarni saqlab qolish, pirovard natijaga erishish, deb qayd etdi yig‘ilish raisi. 
 

Darhaqiqat, ob-havo haroratining keskin ko‘tarilib borayotgani bahorgi ekish ishlarini har qachongidan tezkor va samarali tashkil etishni taqozo etmoqda.
 

Shunga qaramasdan, ayrim hududlarda avtomobil yo‘llari yoqalarida, ihota daraxtzorlari barpo etilishi lozim bo‘lgan maydonlarda, fermer xo‘jaliklari yerlarining chet qismlarida hamda ishlab chiqarish va xizmat ko‘rsatish korxonalari hududlarida daraxt ekish ishlarida sustkashlikka yo‘l qo‘yilayotgani tanqid qilindi.
 

Ayrim tashkilot va korxonalar tomonidan ma’muriy binolar atrofini zamonaviy landshaft dizayni asosida obodonlashtirish ishlariga yetarlicha e’tibor qaratilmayotganiga e’tiroz bildirildi. 
 

Yig‘ilishda ekologiya va o‘rmon xo‘jaligi mutaxassislari bilan hamkorlikda hududlarning iqlim sharoiti va tuproq unumdorligidan kelib chiqqan holda qurg‘oqchilikka chidamli, mahalliy sharoitga mos daraxt ko‘chatlarini ekish zarurligi alohida ta’kidlandi.
 

Shuningdek, yashil maydonlarni sug‘orish tizimlarini yo‘lga qo‘yish, irrigatsiya manbalarini tashkil etish, har bir ko‘chat ekilgan maydon uchun alohida oylik oladigan mas’ullarni mahalliy aholi vakillaridan  belgilash bo‘yicha aniq mexanizmlar ko‘rsatib berildi. 
 

Yig‘ilishda aholi tomorqalaridan samarali foydalanish masalasiga ham alohida e’tibor qaratildi. Ta’kidlanganidek, bahor faslida har bir qarich yerdan unumli foydalanib, mo‘l va bozorbop hosil beradigan ekinlarni ekish muhim ahamiyatga ega. Chunki nihol ekish va urug‘ qadash uchun nihoyatda sanoqli muddatimiz qoldi. Bu ishlar taxminan 20 kun davom etadi. 
 

Viloyat rahbari yurtimiz obodligi, tabiat musaffoligi va aholi farovonligi uchun barchani faollikka chaqirib, oldimizda turgan mas’uliyatli mavsumni uyushqoqlik bilan tashkil etish zarurligini ta’kidladi.
 

Shu maqsadda, joriy yilning 15 apreliga qadar viloyat hududida “Yashil makon” umummilliy loyihasini amalga oshirish bo‘yicha keng ko‘lamli safarbarlik aksiyasi e’lon qilindi. Barcha ishlar maxsus shtablar orqali muvofiqlashtirilib, kunlik tahlil qilib boriladigan samarali nazorat tizimi yo‘lga qo‘yildi.