Ma’lumki,  Sialkot shahri Pokistonda tibbiyot  va sport instrumentlari ishlab chiqarish markazlaridan hisoblanadi.
 

Toshkent viloyati hokimi Zoyir Mirzayev boshchiligidagi viloyat delegatsiyasi Pokiston Islom Respublikasiga amaliy tashrifi doirasida Sialkot shahrida ham bo‘ldi.
 

Shaharda sport anjomlari ishlab chiqarishga ixtisoslashgan “Starpak Martial Arts” kompaniyasi faoliyati bilan yaqindan tanishildi.

Mazkur korxona boks qo‘lqoplari, yakkakurash sport turlari uchun ekipirovkalar hamda sport kiyimlarini ishlab chiqarish bo‘yicha Pokistondagi yetakchi tuzilmalardan hisoblanadi.

Tanishuv davomida kompaniyadagi ishlab chiqarish jarayonlari, mahsulotlarni tayyorlash texnologiyalari, sifat nazorati tizimi va eksport geografiyasi haqida ma’lumot berildi. 
 

Delegatsiya tibbiy asbob-uskunalar ishlab chiqarishga ixtisoslashgan “Rhein" kompaniyalar guruhiga kiruvchi korxonalar faoliyati bilan ham tanishdi. Ular jarrohlik instrumentlari, stomatologik asboblar va tibbiy diagnostika uskunalarini ishlab chiqarish hamda eksport qilishga ixtisoslashgani bilan dunyoga mashhurdir.

Kompaniya mahsulotlari Yevropa, Amerika va Osiyo mamlakatlariga yetkazib beriladi.

Shuningdek, delegatsiya Sialkot shahrida joylashgan “Technimen Agha” kompaniyasi faoliyati bilan ham tanishdi. 
 

Korxona yuqori sifatli jarrohlik instrumentlari, stomatologik vositalar va diagnostika uskunalarini ishlab chiqarishga ixtisoslashgan bo‘lib, Pokistonning tibbiy asbob-uskunalar ishlab chiqaruvchi yetakchi kompaniyalaridan biri hisoblanadi. Kompaniya mahsulotlari qat’iy sifat nazoratidan o‘tkazilib, Yevropa, Amerika va Osiyo mamlakatlariga eksport qilinadi.

Tanishuv jarayonida korxonada qo‘llanilayotgan zamonaviy texnologiyalar, ishlab chiqarish liniyalari va xalqaro bozor bilan hamkorlik tajribasi haqida atroflicha ma’lumot berildi.

Korxonalar mutasadlilari bilan kechgan muloqotlarda sport anjomlari hamda tibbiy asbob-uskunalar ishlab chiqarish sohalarida sanoat kooperatsiyasini rivojlantirish, texnologiyalar almashinuvini kengaytirish va qo‘shma investitsiya loyihalarini amalga oshirish imkoniyatlari muhokama qilindi.
 

Xususan, Toshkent viloyatida sport ekipirovkalari va sport kiyimlari ishlab chiqarishni tashkil etish, shuningdek tibbiy asbob-uskunalar ishlab chiqarish bo‘yicha qo‘shma korxonalarni yo‘lga qo‘yish yuzasidan fikr almashildi.

Ta’kidlanganidek, viloyatda sanoat loyihalarini joylashtirish uchun zarur infratuzilmaga ega maxsus sanoat hududlari mavjud bo‘lib, bu yuqori texnologik ishlab chiqarishlarni qisqa muddatda yo‘lga qo‘yish uchun qulay imkoniyat yaratadi.

Delegatsiya rahbari Zoyir Mirzayev o‘z navbatida pokistonlik ishbilarmonlarni Toshkent viloyatining investitsiyaviy, sanoat va eksport salohiyati bilan tanishtirdi hamda o‘zaro manfaatli hamkorlikni yanada kengaytirishga tayyor ekanini ta’kidladi.

Uchrashuvlar yakunida tomonlar ikki hudud ishbilarmon doiralari o‘rtasida to‘g‘ridan to‘g‘ri aloqalarni mustahkamlash, sanoat kooperatsiyasini rivojlantirish va qo‘shma ishlab chiqarish loyihalarini amalga oshirishdan manfaatdor ekanliklarini bildirdilar.