Toshkent viloyati Pokistonning yirik sanoat guruhlari bilan hamkorlikni kengaytirmoqda
2026-03-12 20:30:00 / Yangiliklar
Toshkent viloyati hokimi boshchiligidagi delegatsiyaning Pokistonga amaliy tashrifi doirasida mamlakatning yirik sanoat kompaniyalari – Omni Group hamda Servis Industries rahbariyati bilan uchrashuvlar o‘tkazildi.
Uchrashuvlarda tomonlar o‘zaro investitsiyaviy hamkorlikni kengaytirish, sanoat va qayta ishlash tarmoqlarida qo‘shma loyihalarni amalga oshirish imkoniyatlarini muhokama qildi.
Xususan, Omni Group kompaniyasining shakar ishlab chiqarish, qishloq xo‘jaligi va bioetanol sohasidagi katta tajribasini inobatga olgan holda, Toshkent viloyatida shakar va oziq-ovqat mahsulotlari ishlab chiqarish bo‘yicha qo‘shma loyihalarni tashkil etish taklif etildi.
Ta’kidlanganidek, viloyatda bunday loyihalarni amalga oshirish uchun maxsus sanoat zonalari, zarur infratuzilma hamda shakar lavlagi kabi xomashyo bazasini rivojlantirish uchun qulay sharoitlar mavjud.
Shuningdek, 1954-yilda tashkil etilgan va bugungi kunda Pokistonning yetakchi sanoat korxonalaridan biri sanalgan Servis Industries kompaniyasi bilan ham ishlab chiqarish kooperatsiyasini yo‘lga qo‘yish masalalari muhokama qilindi.
Kompaniya poyabzal, shina va rezina mahsulotlari ishlab chiqarish hamda ularni xalqaro bozorlarga eksport qilish bo‘yicha katta tajribaga ega.
Muzokaralar davomida Toshkent viloyatida zamonaviy poyabzal yoki shina mahsulotlari ishlab chiqarish bo‘yicha qo‘shma korxona tashkil etish, bu orqali ichki bozorni sifatli mahsulotlar bilan ta’minlash va eksport salohiyatini oshirish masalalari ko‘rib chiqildi.
Tomonlar viloyatda mavjud sanoat zonalari, xomashyo bazasi va qulay logistika imkoniyatlari yirik sanoat loyihalarini samarali amalga oshirish uchun mustahkam asos bo‘lishini ta’kidlab, kelgusida amaliy hamkorlikni yanada kengaytirishga kelishib oldilar.