Toshkent vilоyati hоkimligi

Xabaringiz bor, davlatimiz rahbarining topshirig‘iga ko‘ra, mamlakatimizda har haftaning payshanba kuni vazirlik, idora va hokimliklarda “Yoshlar kuni” bo‘lishi belgilandi. 

 
Shu kuni sohaga mas’ul rahbarlar mahalla, ta’lim muassasalariga borib, yoshlarni eshitadi va muammosini hal qilish yuzasidan tizimli ishlarni tashkil etadi. 
 

Mazkur topshiriqqa javoban, bugun viloyatimizda barcha darajadagi rahbarlar kun tartibining salmoqli qismi yoshlar bilan muloqotlarga bag‘ishlanmoqda. 
 

Toshkent davlat agrar universitetida Toshkent viloyati hokimligi tashabbusi bilan bitiruvchi yoshlarning bandligini ta’minlash masalasiga bag‘ishlangan yig‘ilish bo‘lib o‘tdi. 
 

Toshkent viloyati hokimi o‘rinbosari O. Sultonbekov boshchiligida o‘tgan yig‘ilishda universitet rahbariyati, fakultet dekanlari, bo‘lim boshliqlari va kafedra mudirlari ishtirok etdi.
 

Yig‘ilishda bitiruvchilarni o‘z mutaxassisligi bo‘yicha ish bilan ta’minlash, hududlardagi bo‘sh ish o‘rinlariga yo‘naltirish, ish beruvchilar bilan hamkorlikni kuchaytirish, ta’lim jarayonini amaliyot bilan uyg‘unlashtirish masalalari atroflicha tahlil qilindi.
 

Ayniqsa, dual ta’lim tizimini keng joriy etish, ishlab chiqarish korxonalari bilan integratsiyani mustahkamlash orqali talabalarni o‘qish jarayonidayoq amaliy faoliyatga jalb etish va ular uchun doimiy ish o‘rni yaratish muhim vazifa sifatida belgilandi.
 

Shu bilan birga, har bir bitiruvchi bilan individual ishlash, ularning kasbiy salohiyatidan kelib chiqqan holda manzilli rejalar ishlab chiqish hamda hududlar kesimida aniq takliflar shakllantirish bo‘yicha mas’ullarga tegishli topshiriqlar berildi.
 

Chirchiq davlat pedagogika universitetida ham yoshlar va soha rahbarlari ishtirokida ochiq muloqot tashkil etildi.
 

Unda yoshlarning taklif va tashabbuslarini qo‘llab-quvvatlash, ularni qiynayotgan muammolarni o‘rganish, bandligini ta’minlash va kasbiy rivojlanishi uchun qo‘shimcha imkoniyatlar yaratish masalalari atroflicha muhokama qilindi.
 

Tadbirda Toshkent viloyati hokimi o‘rinbosari Jamshid Bobojonov, viloyat Maktabgacha va maktab ta’limi boshqarmasi boshlig‘i Shukur Burxonov, shuningdek, boshыarmaning shahar va tuman bo‘limlari rahbarlari, ta’lim muassasalari direktorlari hamda bitiruvchi yoshlar ishtirok etdi. 
 

Uchrashuv davomida yoshlarning fikr-mulohazalari tinglanib, ilgari surilgan takliflar yuzasidan mas’ullarga tegishli topshiriqlar berildi. Shuningdek, mavjud bo‘sh ish o‘rinlari haqida ma’lumotlar taqdim etilib, bitiruvchilarni mutaxassisligiga mos ish joylariga yo‘naltirish bo‘yicha amaliy chora-tadbirlar belgilandi.
 

Mazkur uchrashuv va muloqotlar yoshlarni har tomonlama qo‘llab-quvvatlash, ta’lim va mehnat bozori o‘rtasidagi uzviy bog‘liqlikni mustahkamlash yo‘lidagi muhim amaliy qadam sifatida alohida ahamiyat kasb etadi.