Viloyatda "Yashil makon" umummilliy harakatining bahorgi mavsumiga rasman start berildi — oldinda dolzarb 35 kunlik
2026-02-25 14:10:00 / Yangiliklar
Viloyat hokimi Zoyir Mirzayev rahbarligida o‘tgan navbatdagi “Hokimlik soati”da bir qator dolzarb masalalar atroflicha muhokama qilindi.
Yig‘ilish avvalida aholi va qishloq xo‘jaligini ro‘yxatdan o‘tkazish ishlarining yakuniy pallasi davom etayotgani qayd etilib, joylarda bu borada kamchilik va noaniqliklar kuzatilayotgani tanqidiy baholandi.
Mas’ullarga jarayonni qisqa fursatda yakunlash, yuzaga kelayotgan noaniqliklarni tezkor bartaraf etish, aholi bilan manzilli ishlash yuzasidan qo‘shimcha vazifalar yuklandi.
Shuningdek, viloyatda O‘zbekiston Respublikasi Prezidentining farmon va qarorlari, shuningdek, majlis bayonlarida belgilangan topshiriqlar ijrosi bo‘yicha mas’ullar hisobotlari tinglandi.
Viloyat, shahar va tuman hokimliklari hamda boshqarma va tashkilotlarda jismoniy va yuridik shaxslarning murojaatlari bilan ishlash holati tanqidiy tahlil qilindi.
Zoyir Mirzayev viloyatda an’anaviy “Yashil makon” umummilliy loyihasining bahorgi mavsumiga start berilganini e’lon qildi va mazkur masala yuzasidan mas’ullarga, viloyat ahliga, mahalla jamoatchiligiga, korxona va tashkilotlar jamoalariga murojaat bilan chiqdi.
"Bahor nafasi kelib, atrof-muhit uyg‘ona boshladi, lekin biz negadir uyg‘onishga shoshilmayapmiz",
dedi viloyat hokimi jumladan.
Mavsumda ko‘chat ekiladigan hududlarni aniqlab, mas’ullar biriktirish, sug‘orish tizimlarini yo‘lga qo‘yish va parvarish ishlarini sifatli tashkil etish masalalari bo‘yicha takliflar bildirildi. Bu muhim mavsum bo‘yicha viloyatda dolzarb 35 kunlik e’lon qilinib, barcha ishlarni aprelga qadar sifatli yakunlashga kelishildi.
Majlisda, shuningdek, voyaga yetmaganlar foydasiga aliment undirish ishlarining borishi yuzasidan mutasaddilar axboroti eshitildi. Bu boradagi kamchiliklarni bartaraf etish bo‘yicha aniq vazifalar va real muddatlar belgilandi.
Bundan tashqari, geografik ob’yektlarni nomlash va qayta nomlash masalalari bo‘yicha joylarda amalga oshirilayotgan va oshirilmayotgan ishlar ham tanqidiy ko‘rib chiqildi.
Mazkur yo‘nalishda qonun talablariga qat’iy rioya qilish, tarixiy va milliy qadriyatlarni inobatga olish zarurligi qayd etildi.