Ufa shahridagi “Respublika uyi”da Toshkent viloyati va Bashqirdiston Respublikasi o‘rtasida ko‘p tomonlama hamkorlik bo‘yicha kengaytirilgan rasmiy uchrashuv bo‘lib o‘tdi. 
 

Marosimda har ikki tomondan rasmiylar, tegishli tashkilot va  idoralar rahbarlari, savdo-iqtisodiy va investisiyaviy doira vakillari, shuningdek, yirik kompaniyalar va sanoat korxonalari, savdo vakolatxonalari rahbarlari ishtirok etdi. 
 

Toshkent viloyati hokimi Zoyir Mirzayev hamda Bashqirdiston Respublikasi boshlig‘i Radiy Xabirov ikki hudud o‘rtasidagi ko‘p yillik hamkorlik aloqalari, amalga oshirilayotgan qo‘shma loyihalar hamda istiqboldagi rejalarni yuqori baholadilar. 
 

Toshkent viloyati Boshqirdiston biznesi uchun O‘zbekiston va Markaziy Osiyo mamlakatlari bozoriga chiqishda ishonchli maydon bo‘lishga tayyor, deb qayd etdi jumladan viloyat hokimi.
 

Ta’kidlanganidek, keyingi yillarda har ikki taraf xalqaro savdo-iqtisodiy aloqalar maydonida asosiy hamkorlardan biriga aylanmoqda. Toshkent viloyati delegatsiyasining Boshqirdistonga navbatdagi tashrifi mazkur aloqalarni yanada yuksak bosqichga ko‘tarishi bilan ahamiyatlidir.
 

Erkin va samimiy ruhda o‘tgan muloqot chog‘ida bir qator qo‘shma loyihalar qizg‘in muhokama qilindi va ularni o‘z vaqtida amalga oshirish yo‘llari belgilandi. 
 

Xususan, Bekobod tumanida o‘zbek-boshqird texnoparkini tashkil etish ko‘zda tutilmoqda.  Uning qurilishini shu yil bahorda boshlash rejalangan bo‘lib, ayni vaqtda dastlabki qadamlar tashlangan. 
 

Shuningdek, Toshkent viloyatida Bashqirdiston asalarichilik ilmiy-tadqiqot markazi ishtirokida apiterapiya markazini tashkil etish bo‘yicha kelishuvlarga erishildi.
 

Bundan tashqari, Iglin tumanida o‘zbekistonlik investorlar tomonidan chorvachilik sohasida yirik loyihani amalga oshirish, Ufa shahrida mehmonxona qurish, shuningdek, Bashqirdistonda maishiy texnika ishlab chiqarishni mahalliylashtirish imkoniyatlari ham muhokama qilindi.
 

Bundan tashqari Zoyir Mirzayev bir qancha amaliy taklif va tashabbuslarni ilgari surdi. 
 

Jumladan, Toshkent viloyatida va Ufa shahrida hududlarimiz mahsulotlarini yetkazib berish va sotish uchun zarur infratuzilma va omborxonalarga ega savdo uylarini tashkil etish loyihasi ma’qullandi. Shu bilan birga, Boshqirdistonda Toshkent viloyati ishbilarmonlari tomonidan 4 million AQSH dollari miqdorida suvni tozalash reagentlari ishlab chiqarish, asal yetishtirish uchun 500 gektar yer maydoni ajratish, yog‘ochsozlik va to‘qimachilik sohasida ishlab chiqarishni yo‘lga qo‘yish tashabbuslari ilgari surildi. 
 

Shuningdek,  sog‘liqni saqlash va ta’lim sohalarida hamkorlikni yo‘lga qo‘yish taklif etildi.
 

Zoyir Mirzayev mezbonlarga samimiy uchrashuv va mehmondo‘stlik uchun minnatdorlik bildirib, O‘zbekiston va Bashqirdiston o‘rtasidagi o‘zaro manfaatli savdo-iqtisodiy, investisiyaviy va sanoat hamkorlik yangi bosqichda yanada mustahkamlanib borishiga ishonch bildirdi. 
 

Muloqotda O‘zbekiston Respublikasining Rossiya Federatsiyasidagi Favqulodda va Muxtor elchisi Botirjon Asadov ishtirok etdi.